धरान : वराहक्षेत्र नगरपालिकाको आर्थिक वर्ष २०८१÷८२ को लेखा परीक्षण प्रतिवेदनले कुल अद्यावधिक बेरुजु रकम ३३ करोड १७ लाख ९४ हजारभन्दा बढी पुगेको देखाएको छ ।
नगरपालिकामा यस वर्ष मात्र २ करोड ७१ लाख ८५ हजार बेरुजु देखिएकोमा ४ लाख १४ हजार फर्स्यौट भएपछि २ करोड ६७ लाख ७१ हजार बाँकी रहेको छ । गत वर्षसम्मको ३० करोड ५० लाख २३ हजार बेरुजु समेत जोडिँदा कुल रकम ३३ करोड १७ लाख नाघेको हो ।
महालेखाले बेरुजुलाई वर्गीकरण गरी २ करोड ३ लाख ७ हजार नियमित गर्नुपर्ने, ३४ लाख ५ हजार पेश्की बाँकी, २५ लाख ९२ हजार प्रमाण कागजात पेस गर्नुपर्ने र ४ लाख ६६ हजार असुल गर्नुपर्ने देखिएको छ ।
प्रतिवेदनमा बेरुजु बढ्नुका मुख्य कारणमा स्वीकृत दरबन्दी बाहिर करार कर्मचारी नियुक्ति, पुँजीगत बजेटलाई चालु खर्चमा प्रयोग, प्रक्रिया नपुगी आर्थिक सहायता वितरण तथा खरिद नियम उल्लंंघन रहेको उल्लेख गरेको छ ।
कर्मचारी व्यवस्थापनमा मात्रै करिब ७० लाख ७८ हजार खर्च नियम विपरीत देखाएको छ । त्यस्तै पुँजीगत बजेटबाट चालु प्रकृतिका कार्यक्रममा ७७ लाख खर्च गरिएको उल्लेख छ ।
सङ्घीय अनुदानको मौज्दातबाट ५० लाखको स्कोर्पियो खरिद, वस्तुगत मापदण्डबिना १४ लाखभन्दा बढी आर्थिक सहायता वितरण र विद्यालयतर्फ आवश्यक प्रतिवेदन तथा सुधार योजना पेस नगरिएको विषय लाई बेरुजुमा समावेश गरिएको छ ।
खरिद प्रक्रियामा दरभाउ पत्र नलिई सोझै खरिद,कर कट्टी नगर्ने तथा बढी भुक्तानीजस्ता कमजोरी पनि प्रतिवेदनमा औँल्याइएको छ । प्रतिवेदनले नगरपालिका वित्तीय अनुशासन र खर्च व्यवस्थापनमा अझै गम्भीर सुधार आवश्यक रहेको सङ्केत गरेको छ ।
