काठमाडौं : चलचित्र विकास बोर्ड अध्यक्ष केशव भट्टराईको आइतबार राती ५४ बर्षको उमेरमा निधन भएको छ ।

गएराती करिब साढे १० बजे काठमाडौंको चाबहिलस्थित ओम अस्पताल लाँदालाँदै उनको निधन भइसकेको अस्पताल श्रोतले बताएको छ । निधनको कारण भने अस्पतालले खुलाएको छैन । पोस्टमार्टम रिपोर्ट आएपछि मात्र निधनको कारण थाहा हुने बताइएको छ । यद्यपी, उनलाई हृदयघात भएको अनुमान गरिएको छ ।

भट्टराईले दर्जनौँ चलचित्रहरु तथा टेलिसिरियलहरुमा अभिनय गरेका थिए भने ‘आफ्नो मान्छे’, ‘छोडी गए पाप लाग्ला’, ‘देवर बाबु’, ‘कर्मयोद्दा’, ‘सो सिम्पल’, ‘ब्रासलेट’, ‘यात्रा’ लगायतका चलचित्रहरु निर्माण गरेका थिए ।

करिब एक बर्ष अगाडि चलचित्र विकास बोर्डको अध्यक्ष पदमा नियुक्त भएका भट्टराईले केही राम्रा कामको सुरुवात गरेको चलचित्रकर्मीहरु बताउँछन् । उनको शवलाई त्रिवि शिक्षण अस्पतालमा पोष्टमाटर्म गरिने र त्यसपछि श्रद्धान्जलीका लागि चलचित्र बिकास बोर्ड परिसरमा राखिने बताइएको छ ।