इटहरी : नेपाली काँग्रेसका बरिष्ठ नेता डाक्टर शेखर कोइरालाले पारदर्शी र जबाफदेही प्रतिनिधिको रूपमा नमुना काम गर्ने बताएका छन् । सुशासन पारदर्शिता र जबाफदेहिताको सवालमा जनताको अपेक्षा अनुसार काम गर्ने उनले बताए ।
नेपाली काँग्रेस मोरङ क्षेत्र नम्बर ६ ले आयोजना गरेको शुभकामना आदानप्रदान तथा चियापान कार्यक्रममा सम्बोधन गर्दै उनले सुशासनमैत्री प्रतिनिधिको रूपमा काम गर्ने बाचा गरेका हुन् । काँग्रेस नेतृत्वको सत्तारुढ गठबन्धनबाट प्रतिनिधिसभाको उम्मेदवार रहेका डा.शेखरले भ्रष्टाचार र गैरजिम्मेवारीपन बढ्दै गएकोमा चिन्ता व्यक्त गरे ।
यसअघि नेकपा एमालेका उम्मेदवार लालबाबु पण्डित सँग पराजित भएका शेखर यस पटक सुशासन र विकाशको मुद्दा बोकेर चुनावी प्रचारमा छन् । एमालेका लालबाबुले आफू गरिब भएको भन्दै साइकलमा चढेर मत मागेका थिए । डा.शेखर प्रति कटाक्ष गरेका पण्डितले आफू अत्यन्तै निम्न वर्गको व्यक्ती भएको बताएका थिए ।
लालबाबुले २०७४ को निर्वाचनमा १ सय वा ५० रुपैयाँ भए पनि सहयोग याचना गर्दै आर्थिक सहयोग मागेका थिए । पछि लालबाबुको बैङ्कका ५५ लाख बढी रकम, विराटनगरका १ कट्ठा जग्गामा बनेको एक तले घर, ललितपुरको भैसीपाटीमा पत्नी विमलाको नाममा ४ आना जग्गा, १० तोला सुन र १५ तोला चाँदी भेटिएको थियो । जसले गर्दा लालबाबु अपारदर्शी नेताको रूपमा चिनिएका छन् ।
गठबन्धन आवश्यकता हो
नेपालको संवैधानिक व्यवस्था अनुसार गठबन्धन विना सरकार बन्नै नसक्ने अवस्था भएकाले निर्वाचन अगाडी नै गठबन्धन गरिएको डा.शेखरको धारणा छ । सोची सम्झी गठबन्धन भएको बताउँदै उनले भोलिको दिनमा पनि गठबन्धन मजबुत बनाएर लैजाने प्रतिबद्धता जनाए ।
मोरङ ६ लाई नमुना क्षेत्रको रूपमा विकाश गर्न आफूहरू सँग प्रष्ट योजना रहेको उनले बताए । प्रदेशसभा तर्फ (क) बाट माओवादीका जीवन आचार्य र (ख) बाट काँग्रेसका केदार कार्की चुनावी मैदानमा छन् । आचार्य र कार्कीले विकाश निर्माणका कुनै कसर बाँकी नराख्ने भन्दै डा शेखरले केन्द्रीय स्तरबाट गर्नुपर्ने समस्या आफै लागेर समाधान गर्ने उनले बाचा गरेका छन् ।
