विराटनगर : मोरङमा आगामी फागुन ११ गतेदेखि हात्तीपाइले रोग विरुद्धको आम औषधि खुवाउने (एमडिए) अभियान सञ्चालन गरिने भएको छ । 
१५ दिन सम्म अभियान सञ्चालनका लागि स्वास्थ्य कार्यालय मोरङले आज जिल्ला स्तरीय योजना तर्जुमा गोष्ठी गरेको छ । १७ वटै स्थानीय तहका प्रमुख, उपप्रमुख, स्वास्थ्य संयोजकहरूको सहभागिता हात्तीपाइले रोग विरुद्धको औषधि खुवाइने अभियानलाई टोल स्तर सम्म पुर्‍याउने बारे छलफल भएको छ । 
कुल जनसङ्ख्याको ८० प्रतिशत जनसङ्ख्यालाई अभियानमा सहभागी गराउने लक्ष्य सहित अभियान सञ्चालन गरिने बताइएको छ । 
१५ दिने अभियानमा २ वर्षदेखि माथिका, कडा रोग लागेका र गर्भवती बाहेकका व्यक्तिहरूलाई अभियानमा औषधि खुवाउने कार्यक्रम रहेको स्वास्थ्य कार्यालय मोरङका प्रमुख डा. सुरेश मेहताले जानकारी दिए । 
अभियान अन्तर्गत अल्वेन्डाजोल, डाईइथाई, कर्माकाईजीन र आईभरमेक्टिन औषधि खुवाइने स्वास्थ्य कार्यालय मोरङका मलेरिया निरीक्षक राम लामाले बताए। उनले हात्तीपाइले रोग विरुद्धको आम औषधि खुवाउने (एमडिए) अभियानमा सहभागी हुन सबैलाई आग्रह समेत गरे ।