इटहरी : इटहरीमा अत्याधुनिक सुविधा सम्पन्न तिन तले बसपार्क निर्माण कार्य सुरु हुने भएको छ । इटहरी स्थित पुरानो बसपार्क भएको ठाउँलाई व्यवस्थित गर्न १६ करोड २२ लाख १८ हजार रुपैयाँ लागतमा बसपार्क निर्माण हुने भएको हो ।
इटहरी उपमहानगरपालिकाले नगर विकास कोषसँग ऋण लिएर सुरु हुने भएको छ । इटहरी उपमहानगरका मेयर हेमकर्ण पौडेल र नगर विकास कोष काठमाण्डौका कार्यकारी निर्देशक कृष्णप्रसाद सापकोटा बिच इटहरी बसपार्क निर्माण गर्न सम्झौता भएको हो । 
कोषको ७० प्रतिशत लगानी रहने बसपार्कमा इटहरी उपमहानगरपालिकाको ३० प्रतिशत लगानी रहने छ ।। उपमहानगरपालिका इन्जिनियर जीवन घिमिरेका अनुसार एक बिघा क्षेत्रफलमा फैलिने बसपार्कको तल्लो तलामा टिकट काउन्टर, सोधपुछ कक्ष, प्रतीक्षालय, सभा हल, रेष्टुरेन्ट सहितको हुने छ । 
१८ महिनाभित्र सम्पन्न गर्ने गरी निर्माण हुने छ । ५० वटा बस अट्ने क्षमताको हुने उपमहानगरपालिका कार्यालयले जनाएको छ । पार्किङ सानो ठुलो छुट्टै हुने छ । ढल व्यवस्थापन र ड्रेन सहितको सुविधा हुने छ । 
इटहरीका मेयर हेमकर्ण पौडेलले इटहरी भएर नै पूर्व-पश्चिम र उत्तर-दक्षिण चल्ने सवारी साधन गुड्ने हुनाले अरू सहरभन्दा सवारी साधनको चाप बढी हुने क्षेत्रलाई व्यवस्थित गर्न लागिएको बताए । 
बसपार्कमा पार्किङ नभएर चौरस्ता चोक जभाभावी हुँदै आएको थियो अब व्यवस्थित हुनेछ मेयर पौडेलले भने। ‘अब बसपार्क व्यवस्थित हुँदा बिचमा बुकिङ काउन्टरसँगै व्यवस्थित प्रतीक्षालय रहनेछ भने साइडमा पार्किङ स्थल रहनेछ,’ इटहरीका मेयर पौडेलले भने, ‘अब बसपार्क व्यवस्थित गर्दा आम्दानीमुखी बसपार्क हुनेछ।’