सुनसरी : सुनसरीको दुहबी नगरपालिका ३ स्थित कोसी राजमार्गमा लागुऔषध गाँजा सहित पाँच जनालाई प्रहरीले पक्राउ गरेको छ । 
हिजो दिउँसो साढे ३ बजे विशेष सूचनाको आधारमा १ नम्बर प्रदेश प्रहरी कार्यालय विराटनगर आरआइटी र सिआरभी पोष्ट दुहबीबाट खटिएको प्रहरी टोलीले इटहरीबाट विराटनगर तर्फ आउँदै गरेको को २ ह ३०४४ नम्बरको अटो ट्याम्पोलाई चेकजाँच गर्ने क्रममा अटोमा लुकाई छिपाई राखेको १७ किलोग्राम गाँजा बरामद गरेको हो । 
ट्याम्पोमा गाँजा बरामद भए सँगै अटो चालक इटहरी उपमहानगरपालिका ११ का ३७  वर्षीय महमद हजरत अलि, उक्त ट्याम्पोमा सवार रहेका इटहरी १३ का १९ वर्षीय आकाश पटेल र २७ वर्षीय आसिस पटेललाई पक्राउ गरेको हो । 
प्रहरीले अनुसन्धानको क्रममा संलग्न रहेका इटहरी १२ का २७ वर्षीय अरुण कुमार सरदार र देवानगंज गाउँपालिका ५ का २३ वर्षीय मिथिलेश यादव समेतलाई पक्राउ गरी थप अनुसन्धान भइरहेको इलाका प्रहरी कार्यालय दुहबीले जनाएको छ।