धरान : धरान-१७ स्थित पञ्चकन्या माध्यमिक विद्यालयमा ४ कोठे भवन निर्माण कार्यको प्राविधिक मूल्याङ्कन बढाएर आर्थिक चलखेल गरेको देखिएको छ।
प्राविधिक मूल्याङ्कन धरान उपमहानगरपालिकाका सातौँ तहका इन्जिनियर विवेक रौनियारले गरेका हुन । उनले आर्थिक चलखेलमा परेर प्राविधिक मूल्याङ्कन बढी गरेको पुष्टि भएको छ।
अख्तियारबाट निरीक्षण गरिएपछि स्कुलको भौतिक सामाग्री झ्याल फेरिएको र प्राविधिक मूल्याङ्कन पुनः गरिएको प्रधानाध्यापक खेम सुवेदीले नै बताएका हुन ।
उपमहानगरपालिकाका प्रमुख प्रशासकीय अधिकृत भूपेन्द्र राईले गत साउन २९ स्कुललाई पत्र सङ्ख्या १०/१११-०८१/८२ र चलानी नम्बर ८०६ बाट ३ लाख ९२ हजार ३ सय चौबिस रुपैयाँ रकम फिर्ता गर्न पत्राचार गरेका छन् ।
पत्रमा ३ दिन भित्र बेरुजु भएको रकम खातामा दाखिला गर्न स्कुललाई प्रमुख प्रशासकीय अधिकृत राईले उल्लेख गरेका छन् ।
विद्यालय व्यवस्थापन समितिको बैठकमा प्रधानाध्यापक सुवेदीले प्राविधिकलाई ५० हजार रुपया दिनुपर्ने भनी कुरा उठाएको समितिका सदस्यहरूले बताएका थिए ।
बैठकमा केही सदस्यले प्राविधिकलाई रकम दिने कुराको विरोध समेत गरेका थिए । विरोधका बाबजुद प्रअ सुवेदीले रकम निकासा गरी इन्जिनियर रौनियारलाई नगद ५० हजार दिएको सदस्यहरूले बताएका छन् ।
उक्त रकम प्रधानाध्यापकले ठेकेदारका नाममा भुक्तानी गरेको बताएको स्कुल श्रोतले बताएको छ ।
आर्थिक वर्ष २०७८/०७९को राष्ट्रपति शैक्षिक सुधार कार्यक्रम अन्तर्गत ४ काठे भवन निर्माण गर्न ३६ लाख बजेट आएको थियो । स्कुलबाट २ लाख ९९ हजार २ सय ५३ रुपैयाँ थप्ने भएको थियो ।