दमक : दमकबाट बिर्तामोडतर्फ जाँदै गरेको यात्रुवाहक बसमा एक महिलाको मृत्यु भएको छ ।

मोरङको गछिया बस्ने ४३ वर्षीया कुमारी सेलिङ चेम्जोङको साँझ मृत्यु भएको प्रहरीले जनाएको छ।

मे १ ख २५४५ नम्बरको नागरिक यातायातको बस पश्चिमबाट पूर्वतर्फ गइरहेको थियो । साँझ करिब ५:५० बजेतिर झिलझिले पुग्दा यात्रुहरूले चेम्जोङलाई सिटमै अचेत अवस्थामा देखेपछि प्रहरीलाई खबर गरेका थिए।

उनलाई तत्कालै स्थानीय लालीगुराँस मेडिकल हलमा प्राथमिक उपचारका लागि लगिएको थियो । तर अवस्था गम्भीर भएकाले थप उपचारका लागि बिर्तामोडस्थित बीएण्डसी अस्पताल पुर्‍याइएको थियो, जहाँ चिकित्सकहरूले उनलाई मृत घोषणा गरे।

प्रहरीका अनुसार चेम्जोङ दीर्घ रोगी थिइन्, जसका कारण उनको मृत्यु भएको हुनसक्ने आशङ्का गरिएको छ। घटनाको थप अनुसन्धान भइरहेको जनाइएको छ ।