धरान : धरानको बराह र श्रेया सहकारीका पीडित बचतकर्ताले आउँदो स्थानीय निर्वाचन अघि बचत रकम फिर्ता गर्ने प्रक्रिया सुरु गर्न माग गरेका छन् । उनीहरूले माग अनुसार रकम फिर्ता सुरु नगरिए निर्वाचन बहिष्कार गर्ने चेतावनी दिएका छन् ।
सहकारी बचतकर्ता संरक्षण राष्ट्रिय अभियानले बिहीबार धरान उपमहानगरपालिकाका कार्यवाहक नगर प्रमुख अइन्द्र विक्रम बेघालाई माग पत्र बुझाउँदै उक्त चेतावनी दिएको हो । उनीहरूले सहकारी व्यवस्थापन, सञ्चालकको सम्पत्ति छानबिन र बचत फिर्ताका लागि ८ बुँदे माग राखेका छन् ।
माग पत्र बुझाउन आएका टोलीलाई कावा प्रमुख बेघाले सहकारी सम्बन्धी प्रक्रिया अघि बढाउन आर्थिक विकास महाशाखाका प्रमुखलाई पत्राचार गरिएको बताए ।
बराह र श्रेया सहकारीलाई धरान उपमहानगरपालिकाले समस्याग्रस्त सहकारी घोषणा गरे पनि लामो समयदेखि व्यवस्थापन प्रक्रिया अघि नबढेको भन्दै उनीहरूले असन्तुष्टि जनाएका छन् । स्वतन्त्र छानबिन र व्यवस्थापन प्रक्रिया अघि बढ्नेमा आफूहरू अझै विश्वस्त हुन नसकेको उनीहरूले कावा प्रमुखलाई बताए ।
अभियानले व्यवस्थापन समितिमा स्वतन्त्र कर्मचारी तथा विज्ञ टोली मात्र नियुक्त गर्नुपर्ने र कुनै राजनीतिक दल आबद्ध व्यक्तिलाई समितिमा राख्न नहुने माग गरेको छ । व्यवस्थापन समितिमा पीडितका तर्फबाट ३ देखि ५ जना प्रतिनिधि समावेश गर्नुपर्ने उनीहरूको माग छ ।
हालसम्म बिक्री गरिएको सहकारी तथा ग्रुपका सञ्चालकको सम्पत्तिको पुनः छानबिन गरी कानुनबमोजिम फिर्ता ल्याएर पीडितको कोषमा जम्मा गर्नुपर्ने माग छ ।
कुनै बैङ्कले धितोको मूल्यांकनभन्दा बढी ऋण सहकारी सञ्चालकका नाममा प्रवाह गरी बढी ब्याज असुलेको पाइएमा सम्बन्धित बैङ्कलाई समेत छानबिनको दायरामा ल्याउन माग गरिएको छ ।
माग पत्रमा अभियानका धरान नगर अध्यक्ष नवराज प्रधान, सचिव मीना बोहोरा, कोषाध्यक्ष लीना श्रेष्ठ र सूचना विभाग प्रमुख पुकार शाक्यले हस्ताक्षर गरेका छन् ।
