धरान : आफ्ना बचतकर्ता समूहलाई नेशनल लघुवित्तको धरान शाखाले आइतबार वित्तीय साक्षरता बढाउन अनुशिक्षण दिएको छ ।

धरान शाखामा सम्बद्ध समूहका ६० जना अध्यक्ष र सदस्यहरू साक्षरतामा सहभागी थिए ।

कार्यक्रममा धरान-१ का वडाध्यक्ष यज्ञमणि आचार्यले लघुवित्तले दिएको ऋण लिएर ऋणको उचित सदुपयोग गरी आफू सक्षम, सबल बन्ने साथै वित्तीय संस्थाहरूलाई संरक्षण र चलायमान राख्न आग्रह गरे ।

उनले लघुवित्तले निम्न तथा मध्यम स्तरका जनतालाई सहुलियत दरमा ऋण कर्जा प्रवाह गरेर आत्मनिर्भर हुन टेवा दिएको बताए । वडाध्यक्ष आचार्यको प्रमुख आतिथ्यमा कार्यक्रम भएको थियो ।

लघुवित्तका केन्द्रीय अनुगमन अधिकृत विष्णु कुमार विश्वकर्माले हालको बिषम परिस्थितिमा लघुवित्त संस्थाले ग्रामीण महिलाहरू तथा साना उद्यमीहरूको उद्यमशीलता विकासमा महत्त्वपूर्ण योगदान पुर्‍याएको र न्यून आयस्तर भएका परिवारको दु:खको साथी भएको बताए ।

शाखा कर्मचारी सनत खतिवडाले शाखाको कार्यक्रम रणनीति र वित्तीय साक्षरता सम्बन्धी जनाकारी दिँदै प्रतिनिधीहरुको सुझाव सङ्कलन गरेका थिए ।