धरान : नेपाली कम्युनिष्ट पार्टीबाट तेह्रथुममा उम्मेदवारी दर्ता गराएका रनध्वज लिम्बु कन्दङवाले बुधवार धरानमा पत्रकार सम्मेलन गर्दै जिल्लाबाट धरानमा व्यवसाय, शैक्षिक लगायतको पेशामा रहेका मदाताहरुलाई मत याचना गरेका छन् ।
उनले फागुन २१ गते हुने प्रतिनिधि सभा सदस्यको चुनावमा मतदानका लागि तेह्रथुम आउन आग्रह गर्दै चुनाव चिन्ह ‘तारा’ मा मतदान गर्न अनुरोध गरेका हुन् ।   कन्दङवाले संविधानले व्यवस्था गरेको कार्यपालिका, व्यवस्थापिका र न्यायपालिकाको भूमिकाबारे बताउँदै विकास निर्माण कार्यपालिकाको क्षेत्र भए पनि नीति निर्माणमा कमजोरी हुँदा विकासमा समस्या देखिएको बताए । 
तेह्रथुमको स्वास्थ्य, शिक्षा तथा भौतिक पूर्वाधार विकासलाई प्राथमिकतामा राखेर काम गर्ने आफ्नो योजना रहेको बताउँदै उनले भने ‘मेरो जन्मभूमि तेह्रथुमको माटो, वन जङ्गल र खोलानालासँग भावनात्मक रूपमा जोडिएको छ ।’
कन्दङवाले विगतमा विभिन्न राजनीतिक दलमा रहेर प्रदेश नम्बर १ का १४ वटै जिल्लामा सङ्गठन विस्तार तथा पहिचानको अभियानमा सक्रिय भूमिका खेलेको बताए ।