इटहरी : उद्योग वाणिज्य सङ्घ इटहरीको निर्वाचनको माहौल तातिँदै गएको छ । अध्यक्षमा दुई पक्षीय प्रतिस्पर्धाले माहौल रोचक बन्दै गएको हो । अध्यक्षका उम्मेदवार नवराज काफ्लेले आफ्नो प्रतिबद्धतामा डिजिटल उद्योग वाणिज्य सङ्घको नीति अगाडी सारेका छन्।
अध्यक्षका उम्मेदवार नवराज काफ्लेले सङ्घमा नवीकरण नभएर मतदानबाट वञ्चित भएका व्यवसायीलाई लक्षित गर्दै आगामी बर्सहरूमा पसलमै बसेर नवीकरण गर्ने व्यवस्था मिलाउने बताए । उनले भने, ‘नवीकरण नहुँदा धेरै व्यवसायी साथीहरू अधिवेशनमा सहभागी हुन पाउनु भएन । यो दुखद कुरा हो । यसको लागि मेरो तर्फबाट क्षमा माग्दछु । तर आगामी दिनमा पुनः यस्तो अवस्था रहँदैन । अब नवीकरण मुठाबाट होइन मोबाइल बाट हुन्छ ।’
त्यस बाहेक इटहरीको व्यवसायीको समस्या र आगामी चुनौतीलाई मध्यनजर गर्दै विपत् कोषको स्थापना गर्ने उनको भनाइ छ । कुन र कस्तो प्रकृतिको व्यवसाय फस्टाउँछ भनेर अध्ययन गर्ने विशेष व्यवस्था मिलाउने र सोही अनुसार व्यवसायीलाई उत्प्रेरणा दिने उनले प्रतिबद्धता जनाए ।
अध्यक्षकी अर्की प्रत्याशी उम्मेदवार गायत्री कटवालले पनि डिजिटल उद्योग वाणिज्य सङ्घको नीति लिएकी छिन् । स्थायी अक्षय कोष देखि युवा उद्यमीका लागि विशेष स्टार्टअप कोष स्थापना गर्ने उनले बताएकी छिन् । वित्तीय साक्षरता बढाउने देखि घर भाडा सम्झौता र बैङ्किङ समस्या समाधान गर्ने उनको प्रतिबद्धता छ ।
