धरान : कोशी प्रदेशका पर्यटन मन्त्री भीम पराजुलीले साइकल संस्कृतिको विस्तारले इन्धनको खपत घटाई वातावरण बचाउन योगदान गर्ने भएकोले राइडरहरु पर्यटन प्रचारका सन्देश वाहक मानिने बताएका छन् ।
धरानमा शनिवार आयोजित कोरा राइड २०८३ कार्यक्रमको उद्घाटन समारोहमा उनले भन ‘साइकल संस्कृतिको विस्तारले इन्धनको खपत घटाउने, वातावरण संरक्षणमा योगदान पुर्याउने र र नयाँ पुस्तालाई स्वस्थ जीवन शैलीतर्फ आकर्षित गर्नेछ ।’
उनले स्थानीय धार्मिक तथा पर्यटकीय गन्तव्यहरू केन्द्रित बनाएर आयोजना गरिएको कोरा राइडले धरानलाई धार्मिक, सांस्कृतिक र प्राकृतिक शहरको रूपमा अन्तर्राष्ट्रिय पर्यटनको क्षेत्रमा प्रचार–प्रसार गर्ने विश्वास व्यक्त गरे ।
धरानको धार्मिक ऐतिहासिक, पर्यटकीय स्थललाई जोड्दै ३० किलोमिटर लामो ‘कोरा राइड–२०८३’ पेडलर्स धरान माउन्टेन बाइकिङ क्लबको आयोजनामा भएको हो । राइडमा ३०० भन्दा बढी साइकल यात्री सहभागी भएका थिए ।
राइड धरान–२ स्थित भानु चोकबाट सुरु भई धरान–८ को लाङ्घाली सामुदायिक पार्कमा पुगेर सम्पन्न भएको थियो । साइकल यात्राको रुट भोटेपुल,धनकुटे रोड,बुद्ध चोक,घोपा गेट,रेलवे चोक,रत्न चोक,मङ्गलवारे,कल्याण चोक,आँपगाछी,स्वस्तिका चोक,इस्कोन मन्दिर हुँदै अघि बढेको थियो ।
वैष्णवी देवी मन्दिर,धरान रङ्गशाला,फुस्रे,बुढासुब्बा मन्दिर,पिण्डेश्वर मन्दिर,विजयपुर, दन्तकाली मन्दिर,निराञ्जन बस्ती,भिन्टेज फेमिली रिसोर्ट,अधेरी खोला,ठिङ्गाबारी, खैरेनी हुँदै चारकोसे जङ्गल पार गरी लाङ्घाली सामुदायिक पार्कमा पुगेर टुङ्गिएको थियो।
पेडलर्स धरानका अध्यक्ष किसन मास्केले कोरा राइडले धरानका धार्मिक,सांस्कृतिक तथा प्राकृतिक सम्पदालाई एकै यात्रामा समेट्दै आन्तरिक पर्यटन प्रवर्द्धन, वातावरणमैत्री यातायातको प्रयोग र स्वास्थ्यप्रति सचेतना अभिवृद्धि गर्ने उद्देश्य बोकेको बताए ।
कोरा राईडमा धरान बाहेक काठमाडौँ,पोखरा,बुटवल लगायत शहरबाट पनि साइकल यात्रा प्रेमीहरू सहभागी भएको उनले जानकारी दिए ।
