धरान : धरान उपमहानगरपालिकाको बजेटमा फेरि विवाद चर्किएको छ।
बजेटकै विषयमा शुक्रवार बसेको बैठकमा विवाद हुँदा दुई जना वडा अध्यक्षले कावा प्रमुख अइन्द्रविक्रम बेघालाई अमर्यादित शब्द प्रयोग गरेको आरोप लगाउँदै कावा प्रमुख बेघाले शुक्रवार प्रेस विज्ञप्तिमा जारी गरेका छन् ।
विज्ञप्तिमा भनिएको छ आर्थिक वर्ष २०८३/८४ को बजेट निर्माण प्रक्रियालाई व्यापक छलफल,संवाद,सहमति तथा सहभागितामूलक अभ्यासमार्फत निष्कर्षमा पुर्याउने उद्देश्यले बिहान ७ बजे बजेट तर्जुमा समितिको बैठक बोलाइएकोमा विवाद उत्पन्न भएको उल्लेख छ ।
विषयगत समिति तथा सरोकारवालाबिच पटक–पटक छलफल र सहमति भए पनि केही वडा अध्यक्षले सहमति कार्यान्वयन नगर्ने, बजेट समयमै प्रस्तुत हुन नदिने किसिमका अवरोध सिर्जना गर्ने तथा नागरिकका साझा हितसँग सम्बन्धित योजना तथा कार्यक्रमको बजेट कटौती गर्न निरन्तर दबाब दिएको विज्ञप्तिमा उल्लेख छ।
यसले बजेट निर्माण प्रक्रियालाई अनावश्यक रूपमा प्रभावित बनाएकोमा दुःख जनाएको छ ।
विषयगत समिति तथा वडा कार्यालयबाट प्राथमिकताका आधारमा छनोट भएका योजना तथा कार्यक्रमको अन्तिम समायोजनका लागि बसेको बजेट तर्जुमा समितिको बैठकमा वडा १८ का अध्यक्ष नरेन्द्रकुमार राई (प्रवीण) र वडा १५ का अध्यक्ष नरेश इवारामले कावा प्रमुखप्रति अमर्यादित तथा अश्लील अभिव्यक्ति प्रयोग गर्नुका साथै बैठकको मर्यादा विपरीत व्यवहार गरेको जनाइएको छ ।
कावा प्रमुख बेघाद्वारा जारी विज्ञप्तिमा लोकतान्त्रिक व्यवस्थामा मतभिन्नता, आलोचना र असहमति स्वाभाविक भए पनि संवाद, संयम, पारस्परिक सम्मान र संस्थागत मर्यादाभित्र रहेर अभिव्यक्त हुनुपर्ने बताएका छन्। सार्वजनिक संस्थाको गरिमा तथा निर्णय प्रक्रियाप्रतिको जनविश्वास जनप्रतिनिधिको जिम्मेवार आचरणबाटै सुदृढ हुने विज्ञप्तिमा उल्लेख छ।
उक्त घटनापछि शुक्रवारका लागि तय गरिएको कार्यपालिका बैठक र नगरसभा स्थगित गरिएको उपमहानगरपालिकाले जनाएको छ।
साथै कावा प्रमुख बेघाले नगरसभा स्थगनबाट धरानवासीलाई पर्न गएको असुविधाप्रति क्षमायाचना मागेका छन्।
