 (13)_1727965004.gif)
झापा : कोरोना भाइरस (कोभिड १९)को सङ्क्रमण बाट आफ्ना नागरिकलाई बचाउन नेपाल सरकारले गत चैत ११ गतेदेखि सुरु गरेको ‘लकडाउन’ वैशाख ३ गते सम्म बढाइसकेको छ । कोरोना रोकथामकै लागि मानिसहरू बिचको दुरी कायम गर्नका लागि अझ प्रभावकारी बनाउन सरकारले लकडाउन गरेको हो ।
लकडाउनको समयमा सर्वसाधारणलाई घरबाट बाहिर निस्कन रोक लगाइएको छ भने स्वास्थ्य, भन्सार, सुरक्षा, खाद्यवस्तु, खानेपानी, दूध, विद्युत्, दूरसञ्चार, सूचना तथा सञ्चार, क्वारेन्टाइन, फोहोर मैला व्यवस्थापन लगायत अत्यावश्यक बाहेक र अनुमति प्राप्त बाहेकका सवारी साधन चलाउने पाइने छैन ।
‘लकडाउन’ उल्लङ्घन गरेमा सङ्क्रामक रोग ऐन २०२० अनुसार ६ महिनासम्म कैद र ६ सय रुपैयाँसम्म जरिवाना वा दुवै सजाय गर्ने बताइएको छ । यती हुँदाहुँदै पनि‘लकडाउन’ उल्लङ्घन गर्ने बढ्न थालेका छन् । लकडाउनको अर्थ नबुझेर उल्लङ्घन गर्ने मानिसहरू बढ्न थाले पछि झापामा भने प्रहरीले कडा कदम चालेको छ ।
झापामा ‘लकडाउन’ उल्लङ्घन गरेमा दुई घण्टा उभिनुपर्ने भएको छ । इलाका प्रहरी कार्यालय बिर्तामोड र जिल्ला ट्राफिक प्रहरी कार्यालय झापाले लकडाउन उल्लङ्घन गर्ने व्यक्ति र सवारीसाधनलाई दुई घण्टासम्म नियन्त्रण लिई बिर्तामोडको हनुमान कम्प्लेक्स अगाडि उभ्याउने व्यवस्था मिलाएको हो ।
बिर्तामोडको हनुमान कम्प्लेक्स अगाडि लकडाउन सेल बनाएर लकडाउन उल्लङ्घन गर्ने व्यक्तिलाई दुई घण्टा उभ्याइने इलाका प्रहरी कार्यालय बिर्तामोडका डिएसपी मुकुन्द रिजालले जानकारी दिए । उनले लकडाउन उल्लङ्घन गर्ने व्यक्तिलाई दुई घण्टा उभ्याएर लकडाउनको अर्थ र आवश्यकता बुझाएर छाडिने बताए ।
त्यस्तै सवारीसाधनलाई दुई घण्टासम्म नियन्त्रण लिएर जिल्ला ट्राफिक प्रहरी कार्यालय झापाले कारबाही प्रक्रिया अगाडी बढाउने उनले बताए ।
