 (13)_1727965004.gif)
धरान : कोशी प्रदेशमा असोज ११ देखी १३ गते सम्म भएको अविरल वर्षाबाट गएको पहिरोमा परी सबै भन्दा बढी पाँचथर र सोलुखुम्बुमा ५/५ जनाको मृत्यु भएको छ ।
धनकुटामा २, इलाममा १, उदयपुरमा १ समेत कुल १४ जनाको मृत्यु भएको कोशी प्रदेश प्रहरी कार्यालय विराटनगरले जनाएको छ। मृत्यु भएकाहरूमा १३ जना पहिरोमा पुरिएर मृत्यु भएका छन् भने एक जना खोलाले बगाउँदा मृत्यु भएको जनाइएको छ ।
मृत्यु भएकाहरूमा सोलुखुम्बुको दुधकुण्ड-१० की ३३ वर्षिया कविता मगर, २४ वर्षिया रुपु मगर, वडा २ की २३ वर्षिया ल्हामु शेर्पा, वडा ९ की २३ वर्षिया ल्हामु शेर्पा र २८/२८ वर्षिया रिना तामाङ छन् ।
उदयपुरको रौतामाइ-१ की १५ वर्षिया हिसिला तामाङ, धनकुटा-५ पाख्रिबासकी ३२ वर्षिया आशा तामाङ र ५० वर्षिया रामकुमारी तामाङ छन् ।
पाँचथरको फिदिम-४ की २४ वर्षिया सपना शेर्पा, ६ वर्षकी डोल्मा शेर्पा, वडा १ का ५० वर्षीय गोपी विश्वकर्मा, वडा २ की ३८ वर्षिया रञ्जना राई, वडा ८ का ८२ वर्षीय पाशेम्बा शेर्पा छन् ।
इलामको माई नगरपालिका-८ का ६८ वर्षीय मैतबहादुर लिम्बुको खोलाले बगाउँदा मृत्यु भएको छ ।
प्रभावित परिवार सङ्ख्यामा सबैभन्दा बढी झापामा ३०४ परिवार वर्षा र बाढीबाट प्रभावित भएका छन् । मोरङमा १२०, सुनसरीमा ४९, धनकुटामा २३, उदयपुरमा २१, सोलुखुम्बुमा ८, ओखलढुङ्गामा २, सङ्खुवासभामा ११ घरधुरी प्रभावित भएको प्रहरीले जनाएको छ ।
बाढी पहिरोमा प्रभावित परिवार सङ्ख्या १ हजार ६५०, जोखिममा रहेको घर सङ्ख्या ९९ रहेको जनाइएको छ । बाढी पहिरोमा उद्धार कार्य सञ्चालनका लागि कोशी प्रदेश प्रहरीका कुल जनशक्ति १ हजार ९२ प्रहरी परिचालन गरिएको बताइएको छ ।
