धरान : धरानबाट हङकङमा बसोबास गर्दै आएका समुदायको सामाजिक संस्था धरान हङकङ मञ्च र एस अफ स्पेडसले हङकङमा नेपाल फेस्ट २०२५ आयोजना गर्ने भएको छ ।

विक्रम संवत् २०८२ नयाँ वर्षको वैशाख २० र २१ गते हङकङमा २ दिने सांस्कृतिक तथा साङ्गीतिक कार्यक्रम सहितको नेपाल फेस्ट आयोजना गर्ने भएको हो ।

धरानमा बिहीबार पत्रकार सम्मेलन आयोजना गरी धरान हङकङ मञ्चका सचिव रमेश चाम्लिङ राईले उक्त जानकारी दिएका हुन । उनका अनुसार साङ्गतिक कार्यक्रममा प्रमुख अतिथि धरान नगर प्रमुख हर्क साम्पाङ रहने छन् ।

सांस्कृतिक एवं साङ्गतिक कार्यक्रममा नेपालका ख्याति प्राप्त कलाकार, ब्याण्डहरु १९७४ एडि, रचना दाहाल र ट्रीओ नो ट्रीबलका साथै हङकङबासी नेपालीको लोकल ब्याण्डको प्रस्तुति रहने छन् ।

पत्रकार सम्मेलनमा मञ्चका सल्लाहकार नानी चन्द्र सिघकले कार्यक्रमबाट उठेको रकम धरानको विकास र समृद्धिका लागि सहयोग गर्ने जानकारी दिए ।