धरान : हर्क साम्पाङ हटेपछि धरान खानेपानी व्यवस्थापन बोर्डको एक महिनाको आयव्यय विवरण सार्वजनिक गर्दै अध्यक्ष तथा धरान उपमहानगरपालिका कार्यवाहक मेयर आइन्द्रविक्रम बेघाले माघ महिनामा बोर्डको खातामा १ करोड ८२ लाख ११ हजार ६ सय ८२ रुपैयाँ ४५ पैसा मौज्दात रहेको बताएका छन् ।
खानेपानी कार्यालयमा आज शुक्रवार पत्रकार सम्मेलन गर्दै कावा मेयर बेघाले बोर्डको ७१ जना कर्मचारीहरूलाई माघ महिना कर्मचारी तलब मार्फत ३१ लाख ७५ हजार १ रुपैयाँ, ज्यालादारी कामदारलाई ज्याला रकम १३ लाख २४ हजार ६ सय २३ रुपैयाँ भुक्तानी गरिएको बताए ।
यसैगरी माघ महिनामा कार्यालय टेलिफोन महशुल २ हजार, विद्युत् महशुल पम्प तथा कार्यालय ३६ लाख २८ हजार ८५६ रुपैयाँ खर्च भएको छ । क्रेन तथा जेसिवी भाडामा १ लाख ७७ हजार ५०९ रुपैयाँ खर्च भएको छ ।
कार्यालय चिया खर्च तथा ३ वटा सब सिस्टम, सेन्ट्रल कार्यालय खर्च १९ हजार ७२० रुपैयाँ, कामदार खाना खाजा १८ हजार ६८० रुपैयाँ भएको छ ।
खानेपानी संरचना मर्मतमा ५६ हजार ४०१ रुपैयाँ, खानेपानी पाईप लाईन बिस्तार ९ लाख ५५ हजार २०९ रुपैयाँ, पम्प तथा मोटर मर्मतमा २ लाख ७० हजार ३०७ रुपैयाँ, खानेपानी ट्याङकी निर्माण १ करोड ३ लाख २१ हजार ४०४ रुपैयाँ खर्च भएको हिसाब अध्यक्ष बेघाले सार्वजनिक गरेका छन् ।
अध्यक्ष बेघाका अनुसार खानेपानी उत्पादन तथ्याङ्क अनुसार हाल धरानमा भूमिगत र सतह स्रोतबाट दैनिक २३६ लाख लिटर पानी उत्पादन भइरहेको छ । हाल भूमिगत स्रोतको धरान १७ उदय वनबाट १७ लाख लिटर, धरान १५ र ८ को चार कोशे जङ्गलबाट १ करोड ४० लाख लिटर यस्तै धरान १५ र ८ मा प्रदेश सरकारबाट निर्मित बेलबाट १५ लाख लिटर दैनिक पानी उत्पादन भै रहेको छ ।
सतह स्रोतको सर्दु खोलाबाट ४५ लाख लिटर,निसाने खोला धरान–४ बाट २ लाख लिटर, कोकाह खोला धरान–२० बाट १० लाख लिटर, नयाँ ट्याङ्की रिचार्ज पोखरी धरान २० बाट ३ लाख लिटर, भालु खोला धन्यवाद ट्याङ्की धरान–१४ बाट १ लाख लिटर, पकुवा खोलाबाट १ लाख लिटर, कोकाह उपभोक्ता संस्थाको सहकार्यमा धरान ११ बाट २ लाख लिटर गरी जम्मा २ करोड ३६ लाख लिटर पानी उत्पादन भै रहेको छ ।
बोर्ड अध्यक्ष बेघाले धरानमा दैनिक ३ करोड पानी आवश्यक रहेको बताउँदै हालको उत्पादन माग अनुसार कम भएकोले पर्याप्त खानेपानी आपूर्तिमा अझै समस्या विद्यमान रहेको बताए । उनले भने ‘थप पानी उत्पादन र दीर्घकालीन व्यवस्थापनको आवश्यकताको योजनामा उपमहानगरपालिका गम्भीर रहेको छ ।’
