 (13)_1727965004.gif)
भेनेजुएलामा राष्ट्रपति निकोलस मादुरो र विपक्षी नेता जुवान गुआइदोको समर्थकहरुले छुट्टाछुट्टै प्रदर्शन गरेका छन् ।
राजधानी कारागारमा भएका छुट्टाछुट्टै प्रदर्शनमा सहभागीहरुले आ–आफ्नो पक्षमा नाराबाजी गरेका थिए ।
राष्ट्रपति निकोलस मादुरोका समर्थकहरुले विपक्षी नेता जुवान गुआइडोलाई विना कारण अरु देशले उचालेको आरोप लगाए ।
उनीहरुले राष्ट्रपति मादुरोको समर्थनमा विशाल र्याली निकालेका छन् ।
खाकी रंगको टिसर्टमा सडकमा उत्रिएकाहरुले निर्वाचनमा हारेका व्यक्तिले आफूलाई राष्ट्रपति घोषणा गरेकोमा आपत्ति जनाउँदै उहाँलाई कुनै पनि हालतमा राष्ट्रपति मान्न आफूहरु तयार नरहेको बताए ।
यता राष्ट्रपति मादुरोको बिरोधमा काराकासमै गुआइदोका समर्थकहरुले पनि विशाल प्रदर्शन गरेका छन् ।
उनीहरुले तत्काल निष्पक्ष निर्वाचनको वातावरण बनाउन माग गर्र्दै याली निकालेका छन् ।
निर्वाचन तत्काल घोषणा नभए मादुरोलाई सहयोग गर्न नसक्ने र आफैंलाई अन्तरिम राष्ट्रपति घोषित गरेका गुआइदोलाई नै समर्थन गर्ने चेतावनी दिएका छन् ।
यसैबीच राष्ट्रपति मादुरो र भेनेजुएलाका सुरक्षा अधिकारीहरुबीच देशको वर्तमान स्थितिबारे छलफल भएको छ ।
त्यस क्रममा राष्ट्रपति मादुरोले आन्दोलनलाई नियन्त्रणमा लिन आग्रह गर्दै देशको सुरक्षा व्यवस्था झन कडा तुल्याउन निर्देशन दिए ।
विपक्षी नेता गुआइदोले आफैंलाई अन्तरिम राष्ट्रपति घोषणा गरे पनि सेना र प्रहरीले भने मादुरोलाई नै साथ दिएका छन् ।
गुआइदोलाई अमेरिका, क्यानडालगायतका राष्ट्रले समर्थन गरेका छन् भने मादुरोको समर्थनमा रुस, चीन, टर्की र मेक्सिको रहेका छन् ।
