विराटनगर : प्रदेश १ का सामाजिक विकास एवं आन्तरिक मामिला तथा कानुन मन्त्री हिक्मतकुमार कार्कीले सहिद मैदान विराटनगरमा जडान गरिएको फ्लड लाइटको अनुगमन गरेका छन् ।

फ्लड लाइट जडान कार्य अन्तिम चरणमा पुगेपछि मन्त्री कार्कीले आज अनुगमन गरेका हुन् । लाइट जडानमा गुणस्तरीय सामाग्री प्रयोग गर्न मन्त्री कार्कीले निर्देशन दिए । सहिद मैदानका चार कुनामा राखिएका मास्ट पोलको उनले अनुगमन गरेका छन् । अनुगमनका क्रममा मन्त्री कार्कीले प्यारा फिटको मर्मत पनि प्रदेश सरकारले गर्ने बताए ।

अनुगमनका क्रममा सामाजिक विकास मन्त्रालयका सचिव गोविन्दबहादुर कार्कीले फ्लड लाइटका लागि ३ सय केभिको ट्रान्सफर्मर जडानका प्रक्रिया पनि सुरु गरिएको मन्त्री कार्कीलाई जानकारी गराए ।

फ्लड लाइट जडानका लागि गत वर्षको असोज १ गते सामाजिक विकास मन्त्रालय र कार्की बन्धु अमर जेभी कन्स्ट्रक्सन बिच सम्झौता भएको तियो । २ सय १० दिनभित्र निर्माण कार्य सम्पन्न गर्ने सम्झौता गरिए पनि कोरोनाका कारण जडान कार्यमा ढिलाइ भएको कन्स्ट्रक्सनले जनाएको छ ।

मन्त्रालयले फ्लड लाइट्स जडान कार्यका लागि कार्की बन्धु अमर जेभीसँग ४ करोड २९ लाख रुपैयाँमा सम्झौता गरेको थियो । चार कुनमा रहेका प्रत्येक मास्ट पोलमा १ हजार वाटका २७ वटा बल्ब हुने कार्की बन्धु अमर जेभीले जनाएको छ ।