इटहरी : नेकपा एमालेका केन्द्रीय सदस्यले भ्रष्टाचार गरेको भन्दै इटहरी उपमहानगरपालिकाका मेयर द्वारिकलाल चौधरीले आरोप लगाएका छन् । केन्द्रीय र जिल्ला नेतृत्व आर्थीक र नैतिक रूपमा भ्रष्ट भएको उनले बताएका हुन् । 
शनिवार साँझ फेसबुक पोस्ट मार्फत उनले भ्रष्टाचारको प्रमाण सार्वजनिक गर्ने बताएका छन् । २ लाख ३६ हजारको मोबाइल किनेको चेक सहित प्रमाण बाहिर निकाल्ने उनको भनाई छ।
"नेकपा एमाले सुनसरीका केन्द्रीय र जिल्ला नेतृत्व कति सम्म आर्थिक नैतिक रूपमा भ्रष्ट छन् छिट्टै सार्वजनिक  गर्नेछु । २३६००० को मोबाइल कुन चेकबाट कुन मितिमा कति भ्रष्टाचार..चेतना भया !," उनले लेखेका छन्।
यसअघि एमाले सुनसरी जिल्ला अध्यक्ष रेवतीरमण भण्डारी प्रति इङ्कीत गर्दै उनले स्ट्याटस पोस्ट गरेका थिए । अधिवक्ता समेत रहेका भण्डारीलाई जाली भन्दै सम्बोधन गरेका छन् । “जाली वकिल भण्डारी तिमीसँग सायद कलम मात्रै छ । म तिमिलाई तलवार दिन्छु । मेरो हात काट । तिम्रो लागि मेरो खुट्टा काफी छ,” उनले लेखेका छन्। 
पछिल्लो समय नेकपा एमाले पूर्व सचिव तथा प्रदेश १ का निवर्तमान मुख्यमन्त्री भीम आचार्य निकट रहेका चौधरीले भण्डारीको समूह सँग दुरी बढाएका छन् । पुनः इटहरीको मेयरमा दोहोर्‍याउने तयारीमा रहेका चौधरीको लागि भण्डारीले सहयोग गर्न नसक्ने बुझेपछि उनी रुष्ट देखिएका छन् । हालकी उपमेयर तथा एमाले केन्द्रीय सदस्य लक्ष्मी गौतम पनि मेयरको दाबेदार हुन्।