धरान : मङ्सिर ४ गते हुने प्रदेश सभा तथा प्रतिनिधि सभा सदस्य निर्वाचनमा सुनसरी क्षेत्र नं १ प्रदेश सभा (क) मा नेपाली काँग्रेस नेतृत्वको गठबन्धनबाट प्रदेश सभा सदस्यको उम्मेदवार बनेका उमेश थापाले समग्र धरानको इतिहास कायम हुने गरी सुन्दर, सम्पन्न र समृद्धि धरान निर्माणकालागी साना भन्दा साना समस्या प्रति जानकार रहेको बताएका छन् ।
धरानको खानेपानी समस्याको दिगो समाधान, निर्माणाधीन बसपार्क सम्पन्न गरी स्थानान्तरण, बिपी कोइराला स्वास्थ्य विज्ञान प्रतिष्ठानको दिगो सुधार तथा व्यापारिक रूपमा धरानको पुरानो साख फर्काउन आफू सक्षम रहेको समेत जिकिर गरेका छन् । 
मङ्गलवार धरान-७ स्थित गठबन्धनले आयोजना गरेको भेटघाट कार्यक्रममा बोल्दै नेपाली काँग्रेस प्रदेश नम्बर १ कार्य समितिका महामन्त्री समेत रहेका थापाले धरानका सामुदायिक विद्यालयमा शैक्षिक सुधार, सिटी अस्पतालको अवधारणा अगाडि बढाउन लाग्ने उनले स्पष्ट गरेका छन् । गठबन्धनको समर्थन र धरानवासीको चाहना आफू प्रति भएकाले जनताको चाहना र आकाङ्क्षा अनुरूपको विकास निर्माण आफ्नो कर्तव्य हुने बताए । 
उनले भने, "मैले धरानको  समस्या, हावापानी बुझेको छु । धरानवासीको आवश्यकता र चाहनासँग पनि परिचित छु । त्यसैले धरानको विकासप्रतिको चाहना नै मेरो प्रतिबद्धता हुनेछ।"
उनले भने "धरानको विकास जनताको चाहना, राजनीतिक नेतृत्वको सोच कार्यान्वयनबाट मात्र सम्भव छ ।विपन्नहरूको पहुँचमा स्वास्थ्य सेवालाई पुर्‍याएर उदाहरण पेस गर्ने सम्मको योजना बनाएको थापाले बताए । रोजगारीकालागी उद्योग सञ्चालन गर्न उद्योगी र औद्योगिक क्षेत्रलाई आग्रह गर्छु । सकेको केन्द्रीय स्तरमा समेत पहल गर्नेछु ।"