धरान : घरायसी झगडा हुँदा ताप्लेजुङमा एक युवाले हिजो बिहीबार आफ्नै बाबुलाई बाम्फोक प्रहार गरी हत्या गरेका छन् ।
बाबुको हत्या गर्ने छोरा ताप्लेजुङको मिरिङ्देन गाउँपालिका-१ ओख्रेका ३२ वर्षीय सुमन ओख्रावु लिम्बुलाई प्रहरीले पक्राउ गरेको कोशी प्रदेश प्रहरी विराटनगरले जनाएको छ ।
बाबु/छोरा बिच बिहीबार बिहान घरायसी वाद विवाद भएको थियो । विवाद हुँदै गर्दा बिचैमा आफ्नै छोरा सुमनले बाबु ५५ वर्षीय श्याम ओख्रावु लिम्बुलाई बाम्फोक प्रहार गरेका थिए ।
बाम्फोक प्रहारबाट बाबुको घटनास्थलमा नै मृत्यु भएको प्रहरीले जनाएको छ ।
घटनाको जानकारी पाए लगत्तै सन थाक्रा प्रहरी चौकीबाट गएको प्रहरी टोलीले हत्यामा संलग्न छोरालाई बाम्फोक सहित पक्राउ गरेको हो ।
हत्यामा संलग्न रहेका लिम्बुको जिल्ला प्रहरी कार्यालय ताप्लेजुङबाट थप अनुसन्धान भइरहेको छ ।
