विराटनगर : कोशी प्रदेश सभाको बर्खे अधिवेशन आउँदो जेठ ४ गते देखी बस्ने भएको छ ।
कोशी प्रदेश सरकार मन्त्री परिषद्का आज बुधवार बसेको बैठकले प्रदेश सभाको बर्खे अधिवेशन जेठ ४ गते बोलाउने निर्णय गरेको
हो ।
बैठकले प्रदेश सभाको सातौँ अधिवेशन जेठ ४ गते २ बजे बस्ने गरी आव्हान गर्न प्रदेश प्रमुख परशुराम खापुङ समक्ष सिफारिस गर्ने निर्णय गरेको छ ।
आन्तरिक मामिला तथा कानुन मन्त्री रेवती रमण भण्डारीले उक्त जानकारी दिएका हुन । प्रदेश प्रमुख खापुङ समक्ष बैठक आह्वानको लागि सिफारिस गरिएको उनले बताए ।
प्रदेश मन्त्री परिषद् बैठकले स्थानीय सरकार सेवा (गठन तथा सञ्चालन) नियमावलीका बारेमा प्रदेश लोकसेवा आयोगसँग परामर्श माग गर्ने निर्णय गरेको छ । सुनसरीको कोशी गाउँपालिका केन्द्र हेरफेर गर्न बारेमा नेपाल सरकारलाई सिफारिस गर्ने निर्णय पनि गरिएको छ ।
बैठकले कारखाना तथा वर्कसप सञ्चालन निर्देशिका २०८२ स्वीकृत गरेको छ । वैशाख १८ र १९ गते भएको प्रदेश लगानी सम्मेलन सफल बनाउने कार्यमा योगदान दिने सबैलाई हार्दिक धन्यवाद दिने प्रस्ताव बैठकले पारित गरेको छ ।
