धरान : एम्स क्रियटिभ ग्रुपको आयोजनामा यही असार १४ गते शनिवार दोस्रो एम्स एसइई दौड प्रतियोगिता हुने भएको छ। एम्स एसइई रन ६ किलोमिटर आयोजना गर्न लागिएको आयोजक एम्स क्रीयटिभ ग्रुपले जानकारी दिए ।
विद्यार्थीहरू बिच भाइचारा बढाउन,खेलकुदको शहरको रूपमा परिचित धरानलाई शिक्षा र खेलकुदको माध्यमबाट थप प्रोत्साहित गर्न दौड प्रतियोगिताको आयोजनाको सुरुवात गरिएको आयोजक क्रियटिभ ग्रुपका अध्यक्ष सोयु श्रेष्ठले  बताईन ।
उनका अनुसार छात्र र छात्रा गरी दुई समूहमा प्रतियोगिता गराइनेछ । प्रतियोगितामा ३ सय ५० भन्दा बढीले सहभागिता जनाउने आयोजकको भनाई छ ।
दौडमा पहिलो, दोस्रो र तेस्रो हुने महिला तथा पुरुष खेलाडीहरूले जनही नगद ५ हजार, ३ हजार र हजार नगदसहित ट्रफि, मेडल, प्रमाणपत्र पाउनेछन् । यस्तै,विजेताले एम्स एकेडेमीमा प्लस टु अध्ययनको छात्रवृत्ति पनि प्राप्त गर्नेछन् ।
पहिलो हुनेले शतप्रतिशत,दोस्रोले ७५ प्रतिशत र तेस्रो हुनेले ५० प्रतिशत छात्रवृत्ति पाउने प्रिन्सिपल सन्तोष कोइरालाले जानकारी दिए ।
दौडमा सहभागी सबैलाई भर्ना शुल्कमा ५० प्रतिशत छुट दिइने प्रिन्सिपल कोइरालाले जानकारी दिए ।
आयोजकका अनुसार विद्यार्थी बाहेकका खेलाडीले समेत दौडमा सहभागिता जनाउन पाउनेछन्। भने दौडमा सहभागी हुन चाहने बिद्यार्थीहरुको नाम निःशुल्क दर्ता गराइने पनि प्रिन्सिपल कोइरालाले बताए । 
६ किलोमिटर दुरीको दौड प्रतियोगिता चतरालाइनस्थित एम्स एकेडेमीबाट सुरु भएर छाता चौक, सिंहदेवी माछाभौडी,भानु चौक, पुतली लाइन, दुर्गा चौक,बुद्ध चोक, मङ्गलवार,कल्याण चौक, पानीट्याङकी हुँदै एम्स एकेडेमीमानै आएर समापन हुनेछ । प्रतियोगितामा धरान रनको प्राविधिक सहयोग रहनेछ।