पथरी : चर्च ब्वाइज काठमाडौंलाई २–१ गोलले पराजित गर्दै मोरङ फुटबल एकेडेमी उर्लाबारी, मोरङको बेलाबारीमा जारी अन्तर्राष्ट्रिय आमन्त्रण दोस्रो बुद्ध एयर गोल्ड कप फुटबल प्रतियोगिताको फाइनलमा प्रवेश गरेको छ । उपाधिका लागि मोरङ एकेडेमीले शुक्रबार इलाम ११ र युनाइटेड क्लव बिर्तामोड बीच हुने खेलका विजेतासँग प्रतिस्पर्धा गर्नेछ । स्थानीय लक्ष्मी खेल मैदानमा भएको पहिलो सेमिफाइनल खेलमा मोरङ फुटबल एकेडेमीले उत्कृष्ठ खेल पस्कदै चर्च ब्वाइजको फाइनल यात्रा टुङ्ग्याएको हो । मोरङ एकेडेमीका लागि ३६ औं मिनेटमा संजोग राईले पहिलो गोल गर्दै उपाधिको नजिक पुर्याए थिए । राईले गोल पोष्टमा प्रहार गरेको बल चर्चका गोल रक्षकले बाउन्स गरी बचाए पनि बललाई नियन्त्रणमा लिई संजोकले पुन प्रहार गर्दै बललाई जाली चुमाए । पूर्वाद्र्धको इन्जुरी समयमा मोरङ एकेडेमीले थप १ गोल ठोक्यो । मोरङ एकेडेमीबाट मैदानमा उत्रिएका नाइजेरियन खेलाडी फ्याङ्कले टिमका लागि दोस्रो गोल गरे । दिपेश श्रेष्ठले मध्य भागबाट दिएको पासलाई सदुपयोग गर्दै फ्याङ्कले उत्कृष्ठ गोल गरेका हुन् । उत्तराद्र्धमा पनि मोरङ एकेडेमी धेरै वटा राम्रा अवसर निकाले पनि स्ट्राइगर कर्ण लिम्बू गोल गोल गर्न चुकेका थिए। ७९ औं मिनेटमा चर्च ब्वाइजका निरज पौडेलले १ गोल गरे पनि टिमलाई हार्न बाट जोगाउन सकेनन । आजको खेलको म्यान अफ द म्याच मोरङ एकेडेमीका विबेक पौडेल घोषित भए । विबेकलाई उर्लाबारी नगरपालिकाका मेयर खड्ग फागोले ५ हजार नगद सहित ट्रफिले सम्मान गरे । शुक्रबार दोस्रो सेमिफानल खेल इलाम ११ र युनाइटेड क्लव विर्तामोड झापा बीच हुनेछ । बुधबार वर्षाले खेल मैदान हिलाम्मे भएपछि रोकिएको खेल आज भएको हो ।