इनरुवा: पहिलो पटक इनरुवामा ५० ओभरको एकदिवसीय क्रिकेट प्रतियोगिता हुने भएको छ । शान्ति दीप नेपाल र इनरुवा नगरपालिकाको संयुक्त आयोजनामा इनरुवा रंगशालामा हुने पुस २१ गतेदेखि माघ ७ गतेसम्म प्रतियोगिता हुने भएको छ । प्रतियोगितामा १२ टोलीले प्रतिस्पर्धा गर्ने छ । प्रतियोगितामा तीन विभागीय, सात प्रदेश, एक स्थानीय र एक पाहुना टिमको सहभागिता रहने आयोजकले जनाएको छ । प्रतियोगिताको उपाधि विजेताले ४ लाख १ हजार र उपविजेताले २ लाख १ हजार धनराशीको पुरस्कार हात पार्नेछ । यस्तै, सेमिफाइनलमा पुग्ने टोलीले २५–२५ हजार रूपैयाँ पाउनेछ । प्रतियोगिताको उत्कृष्ट खेलाडीले ५१ हजार र विधागतरूपमा उत्कृट हुने बलर र ब्याट्सम्यानले २० हजार १ सय रूपैयाँ पाउनेछ भने फेयर प्ले टिमले १५ हजार हात पार्नेछ । राष्ट्रिय खेलकुद परिषदका सदस्य सचिव केशवकुमार विष्टले काठमाडौंबाहिर ठूलो प्रतियोगिता हुन लागेको कारण भौतिक र आर्थिक सहयोग गर्ने बताए ।