 (13)_1727965004.gif)
धरान: नाटक मञ्चन गर्न सुविधा सम्पन्न थिएटर हल(नाटक घर)को अभाव खट्किए पनि धरानको रंगमञ्चलाई जगाउन आरम्भ नाट्य डबलीले नियमितरुपमा नाटक मञ्चन गर्ने भएको छ ।
गएको पुष २५ गते ३० औं स्थापना दिवसमा लघु नाटक यातनाको अन्त्य मञ्चन गरेको आरम्भले अब प्रत्येक महिना नाटक मञ्चन गर्ने घोषणा गरेको हो । धरानमा थिएटर हल नहुदा रंगकर्मीहरुले धेरै नै सास्ती भोग्नु परिरहेको छ । आरम्भले आफ्नो स्थापना दिवसमा निरन्तर नाटक मञ्चन गर्न भने छोडेको छैन । यसपाली पनि होटल रत्न इनमा लघु नाटक मञ्चन गरेर स्थापना दिवस मनाएको आरम्भले माघ दोस्रो साता पुनः २ सो मञ्चन गरेको थियो । ‘अब धरानमा नियमित मासिकरुपमा नै नाटक मञ्चन गछौ,’अध्यक्ष गोपाल देवानले भने,‘धरानमा थिएटर हल बन्न सकेन, तर हामी होटलमै भएपनि नियमित नाटक मञ्चन गर्ने निर्णयमा पुग्यौ ।’
स्थापना दिवसमा मञ्चन गरेको लघुनाटक यातनाको अन्त्य माघ ११ गते शुल्कसहित २ शो मञ्चान गरिएको थियो । दुवै शो टिकट काटेर हेर्ने दर्शकहरुले हाउसफुल भएकोले पनि रंगकर्मीहरु उत्साहित छन् । रङ्गमञ्चीय हल नभएकै कारण धराने रङ्गमञ्चमा पुस्तान्तरण हुन नसकेको र रङ्गकर्मले निरन्तरता नपाएको अध्यक्ष देवनको भनाई छ । ‘थिएटर हल भइदिएको भए नियमितरुपमा नाटक मञ्चन हुन्थ्यो, र रंगकर्मले गतिशिलता पाउथ्यो । हामीले अहिले नाटक मञ्चन गर्न रंगमञ्चको स्वरुप तयार गर्नुमा नै धेरै खर्च गर्नुपरिरेको छ,’अध्यक्ष देवानले भने ।
धरान कला, साहित्य, गीत,संगीत र सँस्कृतिको धनी सहर मानिन्छ । नाटकको इतिहास केलाउदा वि.स.१९९७ सालदेखि धरानमा नाटक मञ्चन भएको इतिहास छ । कुनै समय यहाँ २ दर्जन बढी नाट्य संस्थाहरु क्रियासिल थिए भने नियमितरुपमा नाटक मञ्चन भइरहन्थ्यो । तर, सुविधा सम्पन्न रङ्गमञ्चीय हल वा नाटक घर तयार हुन नसक्दा धराने रङ्गमञ्च सुक्दै गएको रंगकर्मीहरु गुनासो पोख्छन् । अग्रणी नाट्य संस्था अनाम धरानले नाटक घर बनाउन शुरु गरेपनि विवाद र फुटले पुर्ण हुन सकेन । आरम्भ आफैले २ बर्षअघि धरान ४ खैरेनीमा सिलान्यास गरेको थियो । तर, आर्थिक अभावले नाटक घर बनाउन सकेको छैन ।
आरम्भले गत महिना स्थापना दिवस मनाउने क्रममा तत्कालिन पञ्चायती तानाशाहले धनुषाको जदुकुवा भन्ने ठाउँमा गरेको जघन्य हत्याकाण्डको सत्यघटनामा आधारित लघुनाटक ‘यातनाको अन्त्य’ मञ्चन गर्यो । यस्तै, माघ ११ गते पुनः २ शो होलट रत्न इनमै मञ्चन गर्यो । अहिले फेरी अर्को नाटक मञ्चनको तयारीमा आरम्भ जुटिसकेको छ । ‘हरेक महिना फरक फरक नाटक मञ्चन गर्नेछौ, यातनाको अन्त्य राजनीतिक बिषयबस्तुमा थियो, अब कमेडी बेस नाटक मञ्चन हुन्छ,’आरम्भकी कोषाध्यक्ष विना डि तामाङले भनिन् ।
