इटहरी: हिन्दु धर्मका अभियन्ता एवं युवा सन्त श्रीनिवासाचार्यले नेपाल हिन्दु राष्ट्र कायम गराउन आन्दोलन गर्ने बताएका छन् ।

बुधबार इटहरीमा पत्रकार सम्मेलन गर्दै धर्मनिरपेक्ष राष्ट्र हुदा शान्ति, अमनचयन नभएको धारणा राख्दै हिन्दु राष्ट्र नेपाल हुदा मात्र शान्ति स्थापना हुने बताए । ‘नेपाल हिन्दु राष्ट्र घोषणा नभए हामी देशैभरीबाट आन्दोलनको तयारीमा जुट्नेछौ,’पत्रकार सम्मेलन गर्दै उनले भने,‘अहिले धर्मनिरपेक्ष राज्य हुँदा अमनचयन छैन, हिन्दु राष्ट्र भएपछि सुख, शान्ति, समृद्धि र अमनचयन हुन्छ ।’ उनले अहिले नेपालीको उर्जामाथिको दुरुपयोग रहेको तर्क गर्दै धर्मनिरपेक्षता मानिसको दिलमै नरहेको बताए । ‘पूर्व राजा भएजस्तै नेपालीलाई पनि पूर्व नेपाली बनाउन वेर छैन,’उनले भने,‘देशमा हिन्दु राष्ट्र नभए भयावहको स्थिति आउन सक्छ ।’ धर्मनिरपेक्षताको आडमा धर्म परिवर्तन र संस्कृति लोप भईराखेको पनि उनले बताए ।

सनातन युवा मञ्चको आयोजनामा आगामी जेष्ठ ६ गते इटहरीमा बृहत धर्मसभा गर्न लागेको बताउँदै उनले धार्मिक संघर्ष समितिसँग सहकार्य गरी सरकारलाई दबाब दिने समेत बताए । ‘हामी हिन्दु राष्ट्र हुनुपर्छ भनेर आन्दोलन गर्ने तयारीमा छौँ, धर्मनिरपेक्षताको नाममा भईरहेका विकृतिहरु नहटेसम्म हामी आन्दोलन गछौं,’उनले भने । धार्मिक जनसम्पर्कका कुरामा आँफूहरु समन्वय गरेर देशैभरीबाट आन्दोलन गर्ने तयारीमा रहेको उनले खुलाए । हिन्दु धर्मको लोप हुँदै गएकाले यसको जगेर्ना गर्नका निम्ति सबै लागि पर्नुपर्नेमा उनको जोड थियो । हिन्दु राष्ट्रको पुर्नस्थापनाको माग गर्दै देशैभरी तथा विदेशका समेत धर्मगुरुको उपस्थितिमा उक्त कार्यक्रम सम्पन्न गर्ने युवा सनातन मञ्चका अध्यक्ष नवीन थापाले बताए । जेष्ठ ६ गतेको बृहत धर्मशभामा केन्द्रीय स्तरका नेताहरु समेत आउने उनले बताए ।