_1725945816.gif)
धरान: धनकुटाको दक्षिणी भेग बोधेकी रजनी लिम्बुले दोस्रो ‘मिस स्टेट १’ को उपाधि जितेकी छिन् ।
पूर्वाञ्चल बागिना कला केन्द्रले धरान ८ स्थित सभागृहमा बुधबार राती आयोजित प्रतियोगितामा रजनीले उपाधि जितेकी हुन् । उनले सुजुकीको स्कुटी हात पारिन् । उनलाई गत बर्षको विजेता रमिला बस्नेतले ताज पहिराइदिएकी थिइन् । उपाधिसँगै उनले मिस ट्यालेन्ट, मिस डिसिप्लीनको टाइटल पनि हात पारिन् ।
प्रतियोगितामा खोटाङकी युरिका राई फस्ट रनर अप भइन् । उनले नगद ५० हजार थापिन् । उनले मिस भ्युवर च्वाइसको थप टाइटल पनि थापिन् । यस्तै, धरानकी स्यारोन सुब्बा सेकेण्ड रनरअप भइन् । उनले नगद २५ हजार पाइन् ।उनले मिस वेष्ट स्माइलको टाइटल पनि जितिन् ।
यसैगरी, मिस पम्चुअल निशा योगी, मिस वेष्ट क्याटवक संगीता चौधरी, मिस पब्लिक उषा राई, मिस मस्ट इन्टेलिजन्ट अकु राई, मिस पर्सनालिटी श्रद्धा रिजाल, मिस फोटोजेनिक सिर्जना लिम्बू, मिस इन्टएक्चुअल मेघा न्यौपाने र मिस वेष्ट फिगर नारायणी लिम्बूले जितिन् ।
सुमित भए सिङगिङ स्टार
सोही समारोहमा पूर्वाञ्चल सिङगिङ स्टार सिजन ७ मा मोरङका सुमित राई विजेता भए । गायन प्रतिभाको खोजी गर्ने उद्देश्यले आयोजित प्रतियोगितामा उनले नगद ५० हजार जिते । नगदसँगै उनले २ वटा गीत रेकर्ड, १ वटा म्युजिक भिडियो, १ वर्ष निःशुल्क म्युजिक कोर्ष र गिटार पनि पुरस्कार पाए ।
यस्तै, भोजपुरकी बबिना राई फस्ट रनरअप भइन् । उनले २५ हजार नगद, १ वटा गीत रेकर्ड, ६ महिने निःशुल्क म्युजिक कोर्ष र गिटार पुरस्कार पाइन् । यसैगरि, सेकेण्ड रनरअप सोलुखुम्बुका सुवास वन भए । उनले १५ हजार रुपैयाँ, १ वटा गीत रेकर्ड, ३ महिने निःशुल्क म्युजिक कोर्ष र गिटार पुरस्कार पाए ।
प्रतियोगितामा वेष्ट भोकल, वेष्ट डिसिप्लिन, वेष्ट परफमेन्स, वेष्ट पब्लिक च्वाइसलगायत अवार्ड पनि दिइएको थियो । आयोजक केन्द्रका अध्यक्ष भक्तिराज राईको अध्यक्षतामा भएको कार्यक्रममा धरानका पुर्वमेयर भूपू मेयर मनोजकुमार मेन्याङ्बो प्रमुख अतिथि रहेका थिए ।
