धनकुटा : धनकुटाका सङ्घीय सांसद राजेन्द्र राईले नेपाल पत्रकार महासङ्घ धनकुटाको पत्रकार कल्याणकारी कोषमा ५० हजार रुपैयाँ सहयोग गरेका छन् ।

उक्त सहयोग सांसद राईले पत्रकार महासङ्घ धनकुटाका उपाध्यक्ष नगेन्द्र राईलाई एक महिनाको पारिश्रमिक बराबरको रकम हस्तान्तरण गरेका हुन । पत्रकार महासङ्घ धनकुटाले १० वर्षअघि स्थापना गरेको पत्रकार कल्याण कोषबाट आपत् विपतमा परेका पत्रकारहरूलाई सहयोग गर्दे आएको छ । यस वर्ष भने लकडाउनका कारण समस्यामा परेका धनकुटाका २६ जना पत्रकारलाई पत्रकार महासङ्घ धनकुटाले सो कोषबाट आर्थिक सहयोग गरेको छ ।

सहयोग हस्तान्तरण कार्यक्रम सांसद राईले धनकुटेली जनतालाई कुनै हालतमा भोकै मर्न नदिने बताउँदै फेरि पनि सहयोग गर्ने बताए । यस्तै सहयोग रकम लिएपछि पत्रकार महासङ्घ धनकुटाका उपाध्यक्ष नगेन्द्र राईले विपद्को बेला आएको सहयोगले अग्रपङ्क्तिमा रहेर काम गरिरहेका पत्रकारलाई काम गर्ने हौसला मिलेको बताए ।

महासङ्घलाई सहयोग पछि सांसद राईले स्वास्थ्य मन्त्रालयबाट धनकुटाका लागि आएको २४ लाख २० हजार बराबरको स्वास्थ्य सामाग्री हस्तान्तरण गरेका थिए ।