धरान : पछिल्लो २४ घण्टामा देशभरका विभिन्न जिल्लामा २ सय ३२ जना नयाँ कोरोना सङ्क्रमित थपिएका छन् ।

थपिएका नयाँ सँगै कोरोना सङ्क्रमितको कुल सङ्ख्या १५ हजार ४ सय ९१ पुगेको छ । स्वास्थ्य तथा जनसङ्ख्या मन्त्रालयका अनुसार पछिल्लो समय दुई जनाको कोरोना सङ्क्रमणका कारण ज्यान गएको छ । यो सँगै कोरोनाका कारण मृत्यु हुनेको सङ्ख्या ३४ पुगेको छ । सङ्क्रमितमध्ये ६ हजार ४ सय १५ जना उपचारपछि घर फर्किएका छन् ।

यसै गरी प्रदेश १ मा शनिवार १२ जना कोरोना सङ्क्रमित थपिएका छन् ।

पिसिआर परीक्षणको क्रममा मोरङमा ६, झापामा ५ र इलाममा १ जनामा सङ्क्रमण देखिएको सामाजिक विकास मन्त्रालयले जनाएको छ ।

मन्त्रालयका अनुसार मोरङको विराटनगरमा ३ महिला र २ पुरुष, सुन्दरहरैचामा १ पुरुषमा सङ्क्रमण पुष्टि भएको छ । यस्तै, झापाको कचनकवलमा ४ पुरुष, कनकाईमा १ पुरुषमा सङ्क्रमण देखिएको छ ।

यसै गरी, इलामको देउमाईमा १ पुरुषमा सङ्क्रमण पुष्टि भएको छ । प्रदेश १ मा कोरोना सङ्क्रमितको सङ्ख्या ६ सय ६५ पुगेको छ ।