धरान : झापामा प्रहरीले प्रतिबन्धित लागू औषधसहित दुई युवालाई पक्राउ गरेको छ ।

पक्राउ पर्नेमा भद्रपुर नगरपालिका ३ धिमालधुरा बस्ने २६ वर्षीय अजय थापा मगर र सोही ठाउँका २२ वर्षीय रोशन माझी रहेका छन् ।
हिजो दिउँसो १ बजे गोप्य सूचनाको आधारमा भद्रपुर ४ मन्त्री चोकमा लागू औषध नियन्त्रण ब्युरो काँकडभिट्टाबाट खटिएको प्रहरी टोलीले उनीहरूलाई पक्राउ गरेको हो ।

शङ्कास्पद अवस्थामा सडकको किनारमा रोकिराखेको प्र.१-०१-०१२ प ६९२१ नम्बरको मोटरसाइकललाई नियन्त्रणमा लिई खानतलासी गर्दा मगरले आफ्नो पिठ्युँको पछाडि भिरिराखेको झोलाभित्र NITROSUN- 10लेखिएको चार सय चक्की ट्याब्लेट र CODEINE ESKUF 100 MLलेखिएको पचास बोतल लागु औषध बरामद भएको प्रहरीले जनाएको छ ।

दुवैलाई पक्राउ गरी अनुसन्धान भइरहेको जिल्ला प्रहरी कार्यालयका प्रवक्ता राकेश थापाले जानकारी दिए।