 (13)_1727965004.gif)
इटहरी : प्रेस युनियन सुनसरीले कोरोना बिमा बापतको थप सात लाख रुपैयाँ सात जना सञ्चारकर्मीलाई हस्तान्तरण गरेको छ । बिहीबार एक कार्यक्रमको आयोजना गरी कोरोना पीडित सात जना पत्रकारहरूलाई रकम हस्तान्तरण गरिएको हो ।
युनियन सुनसरी र आईएमई जनरल इन्स्योरेन्स बिच भएको कोरोना बिमा सम्झौता अन्तर्गत उपलब्ध भएको थप सात लाख हस्तान्तरण गरिएको युनियन सुनसरीका अध्यक्ष पवन अधिकारीले बताए ।
‘कोरोना लागेका ३२ जनामध्ये २२ जनालाई एक लाखका दरले रकम हस्तान्तरण गरिसकिएको छ,’ उनले भने, ‘बाँकी दश जनाको रकम पनि आउने प्रक्रियामा छ ।’ उनका अनुसार युनियनले केही दिन अगाडि मात्रै जिल्लाका तीन सय १४ जना सञ्चारकर्मीको निःशुल्क दुर्घटना बिमा समेत गरेको छ ।
बिहीबार पत्रकारहरू रोहित कुमार राई, देवेन्द्र कार्की, हिमाल दाहाल, सञ्जय राई, रामबहादुर कटवाल (आरबी), सरिता कोइराला र विवेक रेग्मीलाई जनही एक लाखका दरले रकम हस्तान्तरण गरिएको थियो ।
पत्रकार रोहित कुमार राईले रकम बुझ्दै भने, ‘कोरोना महामारीले गर्दा अहिले पनि न्यूनतम पारिश्रमिक पाउन समस्या भइरहेको अवस्थामा युनियनले गरेको यो कामको मुक्तकण्ठले प्रशंसा गर्छु ।’ जुनसुकै सङ्गठनमा रहेर भए पनि सम्पूर्ण पत्रकारका हकहितमा काम गर्न सकिने ज्वलन्त उदाहरण युनियन सुनसरी रहेको उदृत गर्दै उनले हरेक सङ्गठनले सबै पत्रकारको हितमा काम गर्न आवश्यक रहेको बताए ।
पत्रकार महासङ्घ सुनसरीका सचिव समेत रहेका हिमाल दाहालले पनि युनियनले गरेको कामको प्रशंसा गरे । उनले भने, ‘कोरोना महामारीले पत्रकारिता क्षेत्र सङ्कटमा परेको अवस्थामा यसबाट पीडित पत्रकारहरूलाई यो रकम उपलब्ध हुनु युनियनको अनुकरणीय काम हो ।’
कार्यक्रमका प्रमुख अतिथि नेपाल प्रेस युनियन प्रदेश १ का संयोजक लिलाबल्लव घिमिरेले कोरोना बापत पाएको उक्त रकम उत्पादनमुखी क्षेत्रमा लगानी गर्न सुझाव दिए ।
‘पत्रकारिता गरेर मात्रै बाँच्ने आधार नभएको अवस्थामा यो रकमले केही उत्पादनमुखी काममा लगानी भएमा सहज हुन्छ जस्तो लाग्छ,’ घिमिरेले भने, ‘काम गर्नका लागि नेताको पछि मात्रै कुद्न नपर्ने भन्ने उदाहरण हो, युनियनको अहिलेको काम ।’
कोरोना महामारीको समयमा सुनसरीका दुई सय ६० जना सञ्चारकर्मीको युनियनले निःशुल्क बिमा थियो ।
