सुनसरी : उच्च शिक्षालय तथा माध्यमिक विद्यालय सङ्घ नेपाल हिसान सुनसरीको स्पोर्ट्स मिट-२०७९ अन्तर्गत हिसान रनमा छात्रतर्फ नमुना कलेज र छात्रातर्फ धरान आदर्श प्रथम भएका छन् ।
इटहरीमा आज शुक्रवार बिहान भएको ५ किलोमिटर लामो दौडमा नमुना कलेजका सरोज सिंहले निर्धारित दुरी १४ मिनेट १० सेकेण्डमा पुरा गरेर प्रथम भए । सुनाखरी एकेडेमीका रोदन राईले १४ मिनेट ३५ सेकेण्डमा निर्धारित दुरी पार गर्दै दोस्रो भए । धरान उच्चका अर्जुन कुमार राईले १४ मिनेट ३६ सेकेण्डमा निर्धारित दुरी पार गर्दै तेस्रो भए ।
छात्रातर्फ धरान आदर्शकी आयशा लिम्बु प्रथम भइन । कस्तुरी कलेजकी इशा यादव दोस्रो र हिमशिखर स्कुलकी तनुजा थापामगर तेस्रो भइन । लिम्बुले निर्धारित दुरी २० मिनेट ४० मिनेट, यादवले २० मिनेट ५४ र थापामगरले २१ मिनेट १० सेकेण्डमा पुरा गरेकी थिइन। प्रथम हुने धावक धाविकाले नगद १५ हजार, द्वितीयले १० हजार र तेस्रोले ५ हजार नगद पुरस्कार पाए ।
विजेता धावक धाविकाहरूलाई इटहरी उपमहानगरका नगर प्रमुख हेमकर्ण पौडेल, जिल्ला प्रहरी कार्यालय सुनसरीका प्रहरी प्रमुख एसपी प्रभुप्रसाद ढकाल, प्रदेश १ ट्राफिक प्रहरी प्रमुख एसपी श्यामकुमार महतोले पुरस्कार प्रदान गरेका थिए ।
