 (13)_1727965004.gif)
- वसन्त राई
धरान : चौविस वर्ष अघि २०५५ सालमा बुढासुब्बा गोल्डकपको पहिलो शुरुआत गरेको धरान फुटबल क्लबले गोल्डकपको २३ औ संस्करणको तयारी तीव्र बनाएको छ । बुढासुब्बा फुटबल काठमाडौँ उपत्यका बाहिरको इतिहासमा पहिलो अन्तर्राष्ट्रिय गोल्डकप हो ।
देश सिर्जना भएका विषम परिस्थितले यसले निरन्तर नपाउने हो कि भन्ने आशङ्का बढेको थियो । तर कोरोना महामारी, त्यसपछिको आर्थिक मन्दीका ठुलो चुनौतीको सामना गर्दै दुई वर्ष पछि भए पनि गोल्डकपले निरन्तरता पाएको छ ।
धरान उपमहानगरपालिकाको संयोजक रहेकाले पनि बुढासुब्बा फुटबलको निरन्तरता रोकिँदैन भन्ने विश्वास यसपालि जागेको छ । २३ औँ गोल्डकपको प्रतीक्षा अब ३ दिन मात्र छ । फागुन १३ देखि २० गते सम्म धरान रङ्गशालामा प्रतियोगिता हुँदैछ ।
गोल्डकपका लागी आयोजक धरान फुटबल क्लबले तयारी तीव्र पारेको छ । मैदानमा पानी हालेर हरियो बनाउने, मैदान वरपर सरसफाइ तथा प्याराफिट मर्मत कार्य धमाधम हुँदैछ ।
यसपालि गोल्डकप आयोजनामा कूल ८५ लाख रुपया खर्च हुने अनुमान गरिएको छ । गोल्डकपको विजेताले नगद १० लाख र उपविजेताले ५ लाख रुपया पाउने छन् । प्रतियोगितामा बङ्गलादेशको केवीपीएस क्लब, भारतको खर्साङको युके एफसी, एभिनर एफसी क्यामरुन, नेपाल पुलिस क्लब, वाग्मती युवा क्लब, मोरङ एघार र आयोजक गरी आठ टिमको मैदानमा उत्रिदैछन ।
