 (13)_1727965004.gif)
झापा : भद्रपुर झापा गोल्डकप अन्तर्गत आजको खेलमा मच्छिन्द्र फुटबल क्लब विजयी भएको छ। मेची रङ्गशालामा जारी प्रतियोगिताको दोस्रो क्वाटर फाइनल खेलमा मच्छिन्द्रले चर्च व्वाइजलाई १ का विरुद्ध २ गोल गर्दै विजयी भएको हो ।
मध्यान्तर सम्म गोल रहित बराबरी भएको खेलमा मध्यान्तरपछि खेलको ५६ औ मिनेटमा चर्च व्वाइजले गोल गर्दै अग्रता लिएको थियो । चर्च व्वाइजले अग्रता जोगाउन नसक्दा खेलको ८० औ मिनेटमा मच्छिन्द्रका सुजल श्रेष्ठले फ्री-किक मार्फत गोल गर्दै आफ्नो टिमलाई बराबरीमा पुर्याएका थिए । खेलको ८४ औ मिनेटमा हेड मार्फत सुन्दर गोल गर्दै विमल घर्तिमगरले मच्छिन्द्रको जित सुनिश्चित गराएका थिए । जितसँगै मच्छिन्द्र प्रतियोगिताको सेमिफाइनलमा प्रवेश गरेको छ ।
भोलिको खेल विभागीय टोली त्रिभुवन आर्मी र भुटानको ड्रुक ल्याउल फुटल क्लब बिच हुने आयोजकले जनाएको छ । आइतबारबाट सुरु भएको गोल्डकप फागुन १६ गतेसम्म सञ्चालन हुनेछ । गोल्डकपमा तीन विदेशी टोलीसहित १० टिमको सहभागिता रहेको आयोजक समितिका अध्यक्ष दीपेश ढकालले जानकारी दिए ।
गोल्डकपको विजेता टोलीले नगद १३ लाख र उपविजेताले नगद ७ लाख रुपैयाँ पाउने आयोजकले जनाएको छ । प्रतियोगिताको प्रत्येक खेलको प्लेयर अफ द म्याचले नगद २० हजार पाउनेछन् । उत्कृष्ट गोलरक्षक, उच्च गोलकर्ता, उदयमान खेलाडी, उत्कृष्ट डिफेन्डर, उत्कृष्ट मिडफिल्डर, उत्कृष्ट फरवार्ड, फाइनल खेलको पहिलो गोलकर्ता र प्रशिक्षकलाई २५ हजार दिइने आयोजकले जनाएको छ । प्रतियोगिताको सर्वोत्कृष्ट खेलाडीलाई नगद एक लाख रुपैयाँ दिइने आयोजकले जानकारी दिएको छ ।
