धरान : नेवार एकता समाजको केन्द्रीय अध्यक्षमा महेश श्रेष्ठ निर्विरोध निर्वाचित भएका छन् । शनिवार भएको निर्वाचन कार्यक्रममा श्रेष्ठ सहित समाजको ११ सदस्यीय कार्यसमिति निर्विरोध निर्वाचित भएको निर्वाचन अधिकृत शरदरत्न पार्थिवले बताएका छन् ।
समाजको नयाँ कार्यसमितिका लागि निर्वाचित सदस्यहरूमा सुरेन्द्रमान स्थापित, हिमाल श्रेष्ठ, मोहन श्रेष्ठ, हरिकृष्ण श्रेष्ठ, दीपेन्द्र श्रेष्ठ, विद्या शाक्य, मञ्जुला श्रेष्ठ, विष्णु (सुन्दरी) श्रेष्ठ, सुमन श्रेष्ठ र राजकुमार श्रेष्ठ छन् । 
समाजको विधान अनुसार निर्वाचित सदस्यहरू बाहेक थप सदस्यहरू मनोनीत गरी कुल २१ सदस्यीय कार्यसमिति गठन हुने प्रावधान छ । त्यस मध्येबाट ३ जना उपाध्यक्ष, १ महासचिव, १ सचिव र १ जना कोषाध्यक्षको मनोनयन हुनेछ ।
निवर्तमान महासचिव दीपेन्द्र श्रेष्ठ कसजुका अनुसार आउँदो चैत ४ गते समाजको पदस्थापन कार्यक्रम हुनेछ । पदस्थापनकै अवसरमा कार्यसमितिका पदाधिकारीहरूको चयन गरिने छ । समाजको धरानका सबै वडाहरूमा वडा स्तरीय शाखा समितिहरू छन् । 
नेवार समुदायको भाषा, संस्कृति, संस्कार तथा आर्थिक सामाजिक विकासका लागि कार्यहरू गर्न धरानमा  स्थापना गरिएको पहिलो नेवार एकता समाज हो । समाजको शाखाहरू धरानका सबै वडाहरूमा कार्यरत छन् । यसलाई अन्य नगर तथा गाउँपालिकाहरूमा पनि विस्तार गरिने भएको छ ।