इटहरी : इटहरीमा केआइइसी ‘इजोरिया इटहरी संवाद’ हुने भएको छ ।
कलेजमा अध्ययन गर्ने विद्यार्थीलाई पठन शैलीको विकास गर्न इजोरिया किताब 'उपन्यास' लेखक सुबिन भट्टराईको उपस्थितिमा उक्त कार्यक्रम हुन लागेको हो । इटहरी जुनियर जेसीजको आयोजनामा हुनलागेको कार्यक्रम इटहरीका पाँच ओटा कलेज र केआइइसीको हलमा हुनेछ ।
इटहरी जुनियर जेसीजकी अध्यक्ष स्मति न्यौपानेले विद्यार्थीलाई लेखकसँग संवाद गरी पठनशैलीलाई अघि बढाउन सकिन्छ भन्ने उद्देश्यका साथ कार्यक्रम आयोजना गरिएको जानकारी दिइन् । धेरै विद्यार्थीले प्रविधिको प्रयोग गरिरहँदा हाम्रो किताब पढ्ने बानी कम हुँदै गएको छ । अध्यक्ष न्यौपानेले भनिन् “किताब पढ्नुको अर्थ र विशेषताबारे लेखकसँग अन्तर्संवाद गर्न पाउँदा विद्यार्थीले धेरै कुराहरू बुझ्नु हुनेछ ।”
दुई दिन सञ्चालन हुने कार्यक्रम फागुन २८ गते बिहान ८ः३० देखि १०ः३० सम्म कस्तुरी कलेज, सोही दिन ११ः३० देखि १ः३० सम्म कोसी कलेज र दिउँसो २ः३० देखि ४ः३० सम्म विश्व आदर्श कलेजमा सञ्चालन हुनेछ । भोलि पल्ट अर्थात् २९ गते बिहान ६ः३० देखि ८ः३० सम्म सुषमा कलेज, ९ बजे देखि ११ बजे सम्म नमुना कलेज र दिउँसो १ बजे देखि २ बजे सम्म के आइइसीमा कार्यक्रम सञ्चालन हुने अध्यक्ष न्यौपानेले बताइन् ।
कलेजमा भएको कार्यक्रममा विद्यार्थीले इजोरिया पुस्तक लेखक भट्टराई सँग अन्तर संवाद गर्न पाउनेछन् । उक्त संवादलाई अझ रोचक र तथा सान्दर्भिक बनाउन पत्रकारद्वय मिलन बुढाथोकी र विराट अनुपम आउनेछन् ।
इजोरिया पुस्तक लेखक भट्टराई पछिल्लो चर्चित उपन्यास लेखक हुन् । उनले इजोरिया उपन्यास अघि प्रिय सुफी, मनसुन, साया, समर लभ लगायत उपन्यासहरू बजारमा चर्चित उपन्यास हुन् ।
