इटहरी : शनिवार देखी इटहरी रङ्गशालामा इटहरी गोल्डकप फुटबल प्रतियोगिता आयोजना सुरु हुँदैछ। तेह्रौँ संस्करणको इटहरी गोल्डकपको सम्पूर्ण तयारी पुरा भएको आयोजकले जनाएको छ ।
प्रतियोगिताको उद्घाटन खेल डिफेन्डीङ च्याम्पियन सगरमाथा फुटबल क्लब (मोरङ) र एभिनियर फुटबल क्लब (क्यामरुन) बिच हुने भएको छ ।
राष्ट्रिय जागृति क्लबले आयोजना गर्न लागेको प्रतियोगितामा १० टिमको सहभागिता रहने भएको छ । क्लबका अध्यक्ष सन्त बहादुर डुम्जनका अनुसार विजेता टिमले नगद १० लाख र उपविजेताले नगद ५ लाख रुपैयाँ पुरस्कार पाउने भएका छन् ।
सर्वोत्कृष्ट खेलाडीले १ लाख साथै विभिन्न विधामा उत्कृष्ट हुनेले २० हजार र म्यान अफ दि म्याचले नगद १० हजार पाउने उनले बताए ।
कन्ट्रोल लुब्रीकेन्ट मुख्य प्रयोजक रहेको प्रतियोगिताको संयोजन इटहरी उपमहानगरपालिकाले गरेको छ । उपमहानगरपालिकाले ११ लाख र कोशी प्रदेश खेलकुद विकाश बोर्डले १४ लाख सहयोग गर्ने भएका छन् ।
एक सातासम्म चल्ने प्रतियोगितामा त्रिभुवन आर्मी क्लब, मच्छिन्द्र क्लब, कञ्चनजङ्घा फुटबल क्लब (भारत), सगरमाथा क्लब (मोरङ), रोलिङ क्लब (झापा), एभिनियर फुटबल क्लब (क्यामरुन) र आयोजक राष्ट्रिय जागृति क्लब बिच प्रतिस्पर्धा हुने भएको छ ।
