काठमाडौँ : निर्माण घोषणासँगै चर्चामा रहेको फिल्म ‘कामिनो’ को कलाकार चयन कार्य समापन भएको छ।
दीपक ओलीको निर्देशनमा निर्माण हुने फिल्ममा केही समयअघि प्रदीप खड्का, वर्षा सिवाकोटी, नीति शाह हुँदै राजबल्लभ कोइराला अनि शुक्रवार मात्रै अर्का अभिनेता सौगात मल्ल अनुबन्धित भएका थिए।
निर्माण पक्षले सोमबार ‘कामिनो’ मा भोलाराज सापकोटा,प्रवीण खतिवडा,रवीन्द्र झा,कुलदीप अधिकारी र आइपी आचार्यलाई अनुबन्ध गरेसँगै नेपाली कलाकारको ‘लाइन अप’ पूरा भएको जनाएको छ ।
एक्सेस नेपाल फिल्मस्को निर्माण,पूर्ण लामा कृएटिभ डिरेक्टर र सुनिल बिष्ट गौली कार्यकारी निर्माता रहेको फिल्मको स्क्रिप्ट महेश दवाडीले लेखेका हुन् ।
नेपाल र ल्याटिन अमेरिकाका विविध स्थानमा छायाङ्कन हुने फिल्मको प्रमुख नेपाली कलाकार फाइनल भए तापनि एक जना भारतीय र एक जना ब्राजिलेयिन कलाकार भने छनौट गर्न बाँकी रहेको बताइन्छ । 
‘प्रमुख नेपाली कलाकार चयन कार्य सकिएको छ,’ निर्देशक ओलीले भने,‘बाँकी विदेशी कलाकार पनि केही दिनमै फाइनल गर्छौ ।’ वैशाख दोस्रो साताबाट छायाङ्कन सुरु गरिने फिल्मको हाल ओर्कसप कार्य भइरहेको छ ।
सौरभ लामाले खिच्ने फिल्ममा एसडि योगी र अलिस कार्कीको सङ्गीत, सम्राट् बस्नेतको द्वन्द्व निर्देशन र दिनेश प्रकाश महराको प्रोडक्शन डिजाइन रहेको छ । दिनेशबहादुर राउत मुख्य सहायक निर्देशक रहेको फिल्मको सहायक निर्देशकमा सागर श्रेष्ठ छन् ।
स्क्रिप्ट लेखनमा लेखक दवाडीलाई कुञ्जन भट्टराईले सघाएका छन् ।