 (13)_1727965004.gif)
- लोकराज निरौला
दासको मानसिकता बोकेकाहरूलाई
मालिक हुने चाहना हुँदैन
त्यसैले उनीहरूलाई गणतन्त्र मन पर्दैन ।
एक्लै खाने एकलकाँटेहरूलाई
साथी छिमेकी मन पर्दैन
त्यसैले उनीहरूलाई सङ्घीयता मन पर्दैन ।
...
आफ्नो मात्र धर्म ठुलो ठान्नेहरूलाई
अरूको धर्म मन पर्दैन
त्यसैले उनीहरूलाई धर्म निरपेक्षता मन पर्दैन ।
...
आफै मात्र खानेहरूलाई
अरूलाई केही दिन मन लाग्दैन
त्यसैले उनीहरूलाई समानुपातिक समावेशिता मन पर्दैन ।
...
जातीय अहंकारवादीहरुलाई
अरूको अस्तित्व स्विकार्न मन लाग्दैन
त्यसैले उनीहरूलाई जातीय पहिचान मन पर्दैन ।
...
भूगोलमा ठुलो राष्ट्र खोज्ने
अन्धा राष्ट्रवादीहरूलाई
मधेसको धोती र हिमालको बख्खु मन पर्दैन ।
...
जातीय भेदभाव र छुवाछुत बार्ने
अन्धा जातीवादीहरुलाई
जातीय एकता र सद्भाव मन पर्दैन ।
...
लिङ्गिय शोषण र उत्पीडनमा रमाउने
कठोर धर्म संस्कार परम्परावादीहरूलाई
छाउपडी गोठ भत्काएको मन पर्दैन ।
...
आलिसान महलमा बसेर अघाएका
सुकिला मुकिलाहरुलाई
श्रमजीवी भोका नाङ्गा मान्छेहरू मन पर्दैन ।
...
बल र वैशले मात्तिएकाहरूलाई
कुनै अर्ति उपदेश लाग्दैन
त्यसैले उनीहरूलाई निर्धा दुब्ला मान्छेहरू मन पर्दैन ।
