 (13)_1727965004.gif)
मलाई लाग्छ यी कुराहरूमा हामी स्पष्ट हुन जरुरी हुन्छ मेरो बिचारमा यदि अभियन्ता साम्पाङले गर्नु भएको हो भने मलाई भन्नु केही छैन । होइन मेयर साम्पाङले गर्नु भएको हो भने नगरपालिकाको नीति तथा कार्यक्रममा ल्याउनु पर्यो । नीति तथा कार्यक्रममा पार्न नसकिएको भए कार्यपालिका बैठक द्वारा अनुमोदन गराएर कार्यक्रम लाई नियमित गराउनु पर्यो ।
तर यी दुवै प्रक्रियाहरू पुरा गरेको देखिँदैन । यस्तो अवस्थामा वडा अध्यक्ष तथा कार्यपालिका सदस्यहरूले असहयोग गरे भन्ने प्रचारबाजी गरेर अरूलाई विवादमा ल्याएर आफू ओभानो भएको भ्रम छर्न हाल सम्म हर्क साम्पाङ सफल देखिन्छ ।
मेयरका यी भ्रम चिर्न वडा अध्यक्षहरू हालसम्म असक्षम देखिएका छन् । यदि कार्यपालिका सदस्यहरूलाई पनि जबाफदेही बनाउने हो भने, कोकाह खानेपानी आयोजना लाई कानुनी र व्यवहारिक रूपमा नियमित गराएर सरकारी आर्थिक नियम अनुसार मात्र बैङ्क खाता खोलेर चेक र खर्च भौचर भरेर मात्र आम्दानी तथा खर्च गर्न सकिन्छ ।
यी कुनै पनि कानुनी प्रक्रिया पुरा नगरी हर्क साम्पाङ्गले आफूखुसी सञ्चालन गरिएको योजनामा कार्यपालिका सदस्य तथा वडा अध्यक्षहरूलाई कसरी जबरजस्ती जबाफदेही बनाउन सकिन्छ ? त्यसैले यो आयोजनालाई पहिला ऐन नियम र कानुन अनुसार नियमित गराउन जरुरी हुन्छ ।
अन्यथा कसैलाई दोष नथोपारीकन अभियन्ता हर्क साम्पाङ द्वारा सञ्चालित आयोजना घोषणा गरी आयोजनाको सम्पूर्ण जिम्मेवारी र जबाफदेहिता आफै लिएर जानु पर्यो । मेरो बिचारमा कसैलाई दोषारोपण र गालीगलौज गरेर धरानको सामाजिक, राजनीतिक तथा जातीय सद्भाव भड्काएर द्वन्द्व अवस्था सृजना गर्नु सर्वथा गलत हुनेछ । कुनै पक्ष बाट पनि यस्तो हर्कत नहोस् । सम्पूर्ण नगरवासीको यही अपेक्षा रहने छ । धन्यवाद.
(मेयन्याङबो धरान उपमहानगरपालिकाका पूर्व मेयर हुन)
