धरान : कोशी नाम खारेजी र पूनःनामकरणको माग गर्दै धरानमा आज शनिवार साँझ 'पहिचानकालागि युवा दस्ता' सुनसरीले राँके जुलुस प्रदर्शन गरेको छ ।
प्रदेशको विभिन्न जिल्लामा आन्दोलनकारी धरपकड भइरहेको बेला आजको राँके जुलुसमा भने प्रहरीले हस्तक्षेप गरेन ।
अश्रुग्याँस गन समेत लिएर भानुचौकमा तैनाथ प्रहरी समूह देख्दा झडप हुने अनुमानले साँझ भानुचौकमा मानिसहरू ठुलै सङ्ख्यामा वरिपरि रमिता हेरेर बसेका थिए ।
प्रदर्शनकारीको राँके निभाउन प्रहरीले प्लास्टिकको बाल्टीमा पानीको व्यवस्था समेत गरेकाले प्रहरी हस्तक्षेप हुने अनुमान गरिएको प्रत्यक्षदर्शीहरुले बताए ।
प्रदेश सरकार अल्पमतमा परेको र आन्दोलनकारी सँग वार्ता गर्न समिति समेत गठन गरेकोले हस्तक्षेप नभएको अनुमान गरिएको छ ।
राँके जुलुस धरान-३ को पानमारा बसस्टेण्डबाट माछाभौडी, देशिलाईन हुँदै भानुचोक आइपुगेको थियो । प्रहरीले राँकोको आगो पानी हालेर निभाउन खोज्दा प्रदर्शनकारीले रोकेका थिए ।
लगत्तै भानुको सालिकमा अघि भएको कोणसभामा जसपा केन्द्रीय सदस्य जेन्ट्ल लावती, नेकपा एस नगर सचिव खेम दाहाल, पहिचानका लागि युवा समिति सुनसरी सदस्य डेबिट सुब्बाले कोशी नाम खारेज नभए सम्म आन्दोलन जारी रहने बताए ।
पहिचानका लागि युवा सुनसरीका अध्यक्ष राजु के राईको नेतृत्वमा राँके जुलुस प्रदर्शन भएको हो । कोणसभामा राईले पहिचानलागि जस्तोसुकै सघर्ष गर्दै जीवन बलिदान दिन तयार रहेको बताए ।
सभामा पहिचानवादी राजनैतिक दलहरू, जसपा, नेकपा माओवादी, राष्ट्रिय जनमुक्ति पार्टी, लिम्बुवान, नागरिक उन्मुक्ति पार्टी, खम्बुवान सहित किरात याक्थुङ चुम्लुङ, किरात राई यायोक्खाका कार्यकर्ता सहभागी थिए ।
यसअघि धरानमा गएको जेठ १६ गते पहिचानवादी युवाहरूको भेलाले राजु के राईको संयोजकत्वमा ६३ सदस्यीय पहिचानका लागि युवा दस्ता गठन गरेको थियो ।
