 (13)_1727965004.gif)
काठमाडौँ : बेलायतमा ऐतिहासिक रेड कार्पेट प्रिमियम गरेपछि नेपाली चलचित्र ‘गोर्खा वारियर’ले अन्तर्राष्ट्रिय जगतमै चर्चा कमाएको छ ।
गोर्खा वारियर हालै ‘ब्रिटिस एकेडेमी अफ फिल्म एण्ड टेलिभिजन आर्ट्स’ (बाफ्टा) अवार्डका लागि समेत चयन भएपछि यसको चर्चा झनै चुलिएको छ । नेपालमा यो चलचित्रको तीव्र पर्खाइ भइरहेको बेला अब ११ फागुनबाट यसलाई देशव्यापी रिलिज गर्न लागिएको निर्देशक मिलन चाम्सले जानकारी गराएका छन् ।
यो चलचित्रको रिलिजबारे निर्देशक चाम्सले भने, ‘चलचित्र गोर्खा वारियरलाई नेपालमा हामीले फागुन ११ बाट रिलिज गर्दै छौ भने भारत र दक्षिण कोरियाको रिलिजका लागि यो फिल्मको बिक्री भइसकेको छ । यस्तै अमेरिकाको एउटा चर्चित वितरक कम्पनीले गोर्खा वारियरलाई भारत र कोरियाबाहेक विश्वव्यापी रूपमा रिलिज गर्दै छ ।’
नेपाली, हिन्दी, अङ्ग्रेजी गरी तीन भाषामा निर्माण भएको यो चलचित्रलाई अब कोरियन भाषामा पनि रिलिज गरिने भएको छ । कोरिया रिलिजको लागि कोरियन भाषामा डबिङको कार्य पनि धमाधम भइरहेको निर्देशक चाम्सले जानकारी गराएका छन् ।
दोस्रो विश्व युद्ध अन्तर्गत मलायाको युद्धमा गोर्खा सैनिकले वीरताका साथ लडेर हासिल गरेको सफलतासँगै उनीहरूको सङ्घर्षको कथा यो चलचित्रमा समेटिएको छ । संसारमै साहसिक भनेर चिनिने गोर्खाली योद्धाको सङ्घर्षमा आधारित यो चलचित्रले उनीहरूको युद्ध सँगै पारिवारिक कथालाई गोर्खा वारियरले पर्दामार्फत विश्वका दर्शकमाझ पुराउने कथन निर्देशक मिलन चाम्सको रहेको छ ।
यो चलचित्रका मुख्य अभिनेता रितेश चाम्सले गोर्खा वारियरबाटै डेब्यु गरेका हुन् । रितेस सँगै यो चलचित्रमा विजय लामा, रेविका गुरुङ, शिशिर बाङ्देल, कविता आले, रियर राई, बिरूप घले, सारा राई लगायतका कलाकारहरूको मुख्य भूमिका रहेको छ ।
यो चलचित्रको निर्मातामा मिलन चाम्स, सुमन राई, सुस्मिता वाइवा छन् । यस्तै कार्यकारी निर्मातामा प्रशान्त थापा, राजेन्द्र घिमिरे एवम् सह निर्मातामा सुरेश राई रहेका छन् । यो चलचित्र लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण भएको हो ।
गोर्खा वारियरमा निर्देशक मिलन चाम्स र गिरिराज घिमिरेको लेखन, मिलन श्रेष्ठको सम्पादन, सुदीप बरालको डीओपी, हिमाल केसीको द्वन्द्व निर्देशन, शैलेन्द्र खनाल ‘शरद’को गीत, एलिस कार्कीको सङ्गीत, राजेशपायल राईको गायन, राजेन्द्र मोक्तानको रङ्ग संयोजन रहेको छ । यो सिनेमाको हिन्दी भर्सनमा भारतीय गायक सानको स्वरमा गीत रहेको छ ।
