विराटनगर : कथाकार गुरुप्रसाद मैनालीको नाटक 'कर्तव्य' शनिवार ५१औँ पटक मञ्चन गरेर झोराहाट नाट्य समूहले नयाँ रेकर्ड बनाएको छ ।
मैनालीको उक्त नाटक कक्षा १० को पाठ्य पुस्तकमा समावेश भएकोले दर्शकहरूमा विद्यार्थीको सङ्ख्या अधिक भएकाले प्रदर्शनको शृङ्खला लम्बिएको समूह अध्यक्ष भरत गुरागाईँ 'बर्बरिक'ले बताए । उनी नाटकका निर्देशक, कलाकार पनि हुन ।
उनका अनुसार झापाको गौरादहमा ३० पटक मञ्चन भएको नाटक झोराहाटमा २१औँ पटक पुगेपछि ५१औँ पटक मञ्चन भएको हो । मोरङको झोराहाट स्थित झोराहाट नाटक घरमा नाटक मञ्चन भइरहेको छ ।
भदौ १ देखि १० गतेसम्म मञ्चन गर्ने कार्यक्रम भए पनि दर्शकको बढ्दो मागले अब कहिले सम्म मञ्चन हुन्छ भन्ने टुङ्गो नभएको उनको भनाइ छ । नाटक हेर्न दमक, उर्लाबारी, इटहरी, विराटचोक, इनरुवा, धरान, विराटनगरबाट दर्शक आएका थिए ।
नाटकमा सुदीपजंग कार्की, निशा ढुङ्गेल, दीपक निरौला, प्रज्ज्वल भट्टराई, सन्तोष बन्बो तामाङ, लीला खत्री, अभिसा तामाङ, शिखा लिम्बू, देवानन्द राजवंशी, निर्मला गुरागाईँ, सुशीला दंगाल, प्रदीप परियार र लक्ष्मी सिग्देलले अभिनय गरेका छन् ।