धरान : उपमहानगरपालिकाका नगर प्रमुख हर्क साम्पाङले आफ्नो कार्यकक्षमा ताला लगाएर युके हिँडेपछि कार्यवाहक प्रमुख लोकेन्द्र फागो कार्यकक्ष बाहिर नगर प्रमुखको सहयोगीहरू बस्ने वेटिङ रुममा बसेका छन् ।
मङ्गलवार असोज २८ गते देखि कार्यवाहक प्रमुख पाएका फागोको बसाइँले कार्यवाहक पदको बेइज्जत भएको टिप्पणी सामाजिक सञ्जालमा भाइरल भएको छ ।
यातायात व्यवसायी महासङ्घका कोशी प्रदेश संयोजक सरोज श्रेष्ठले लेखेका छन् ‘कार्यवाहक मेयरले चौकीदारको जिम्मेवारी दिएको छ भने जस्तै मेयरको कोठामा नभई बाहिर पिएहरु बस्ने रिसेप्सन कोठामा टेबल व्यवस्था गर्नु र त्यही बसेर कार्यवाहकको कार्यालय सञ्चालन गर्नु लज्जास्पद ।’
उनले यस्तो विवादास्पद कामको बारेमा अन्य वडाध्यक्ष, कार्यपालिका सदस्यहरू, राजनीतिक दलहरू किन मौन छन् ? भनी प्रश्न गरेका छन् ।
नगर प्रमुख साम्पाङले कार्यकक्षमा ताला लगाएको मात्र होइन, ताला तोडेर कोही पस्छ भने झैँ ढोकामा सोफा समेत तेर्स्याएका छन् ।
कावा प्रमुख फागोलाई ‘किन बाहिर बस्नु भएको ?’ भनी प्रश्न गर्दा बोल्ने चाहेनन् । उनले भित्र बस्नु भन्दा बाहिर बस्दा साथीहरूसँग बोल्दै बस्न पाउने भएकोले बाहिर बसेको बताए ।
यसअघि कार्यवाहक प्रमुखहरू नगर प्रमुखकै कार्यकक्ष भित्र बसेर दैनिक जिम्मेवारी पुरा गर्दथे । उपमहानगरपालिकाका कर्मचारीहरू अनुसार कार्यवाहक प्रमुख कार्यकक्ष भित्रै बस्ने तर प्रमुखको कुर्सीमा बस्दैनथे प्रमुखकै कुर्सी छेउमा अर्को कुर्सी राखेर बस्ने गर्दथे ।