काठमाडौँ : कमेडी शो 'कमेडी नाइट विथ च्याम्पियन' सुरु हुने भएको छ । कमेडी क्लब विथ च्याम्पियनका सबै टिम अब 'कमेडी नाइट विथ च्याम्पियन' लिएर आउने भएका हुन् । कार्यक्रममा आबद्ध सम्पूर्ण कलाकारहरूले कार्यक्रमको लोगो शेयर गर्दै कार्यक्रमको औपचारिक जानकारी गराएका हुन् ।

कमेडी शोहरुमा एकलौटी राज गरिरहेका विशाल भण्डारीको निर्देशनमा बन्ने शोमा यो पटक सुमन कार्की,मेक्सम गौडेल, सजन श्रेष्ठ, कैलाश कार्की, पवन भट्टराई सँगै भरतमणि पौडेल, सन्तोष थापा, सुमन कोइराला र प्रभात लामा जोडिएका छन् ।

कार्यक्रमको अध्यक्षको रूपमा कलाकार तथा निर्देशक दिपाश्री निरौला यसपटक पनि यथावत् रहेकी छन् । पहिलो सिजनलाई दर्शकले मन पराएका थिए ।

अब दोस्रो सिजन अझै भव्य सेटमा खिच्ने तयारी भई रहेको कार्यक्रमका होस्ट समेत रहेका निर्देशक भण्डारीले बताए । यो पटक दर्शकले प्रतीक्षा गरी रहेका कमेडियनहरुको प्रस्तुतिले कार्यक्रम अझै उत्कृष्ट बन्नेमा निर्माण टिम ढुक्क देखिएको छ ।

कार्यक्रम मङ्सिर महिनाको अन्त्यतिरबाट हिमालय टेलिभिजन र ओएसआर रियालिटी मार्फत प्रसारण हुनेछ ।