_1735354691.gif)
धरान : कोशी प्रदेशको पर्यटकीय क्षेत्र घुम्न आउने भारतीय पर्यटकहरूले भोग्दै आएका समस्या सहज बनाउन दुवै पक्षबाट पहल गरिने मुख्यमन्त्री हिक्मतकुमार कार्कीले बताएका छन् ।
उनले कोशी टप्पु अर्ना आरक्षमा बिहीबार भारतीय पत्रकारहरूसँग कुराकानी गर्दै भारतीय पर्यटकहरूलाई नेपाल आउँदा पर्ने सबै झन्झटिला प्रक्रियाहरू हटाइने बताए ।
मुख्यमन्त्री कार्कीले भने ‘नेपालमा आउँदा भारतीय पर्यटकहरूलाई गरिने अनावश्यक चेकजाँच र नोट सटहीको समस्यालाई हटाउन दुईपक्षबाटै पहल गरिने छ ।’
प्रदेश सरकारले आगामी २०८२ साल लाई कोशी पर्यटन वर्ष मनाउने तयारी गरिरहेको बताउँदै उनले भारतको बिहार, पश्चिम बङ्गाल लगायतका पर्यटकलाई नेपाल भ्रमण सहज बनाउन आवश्यक समन्वय र सहजीकरण गरिने बताए ।
कोशी टप्पुमा बसेको पर्यटन वर्षको मूल आयोजक समितिको बैठक पछि मुख्यमन्त्री कार्कीले भारतीय पत्रकारहरूसँग कुराकानी गरेका हुन ।
मुख्यमन्त्री कार्कीले भारतीय पत्रकारहरूलाई नेपाल-भारत बिच भातृत्वपूर्ण सम्बन्ध रहेको बताउँदै भने ‘यो सम्बन्धको आधारमा नेपालको पर्यटन प्रवर्द्धन गर्न तपाईँहरूले प्रमुख भूमिका खेल्नु हुनेछ ।’
कोशी प्रदेशको समृद्धिको मुख्य आधार पर्यटन भएको उल्लेख गर्दै उनले पर्यटन प्रवर्द्धन गर्न प्रदेश सरकार लागि परेको बताए ।
यसअघि मूल आयोजक समितिको बैठकले कोशी प्रदेशका लागि आगामी वर्ष गरिने कामको रणनीति पारित गरेको छ ।
प्रदेश सरकारले आगामी वैशाख १ गते तेह्रथुमको मिल्के जलजले क्षेत्रमा पर्यटन वर्षको उद्घाटनका लागि मुख्यमन्त्री कार्कीको नेतृत्वमा मूल आयोजक समिति गठन गरेको छ ।
_1664681437.jpg)
