धरान : अब कुनै योजना संरचनाको उद्घाटन प्रधानमन्त्री, मन्त्रीबाट गराउनु परेमा अनिवार्य कार्यक्रमस्थलमा उपस्थित गराउन जरुरी नहुने भएको छ ।

प्रधानमन्त्री केपी शर्मा ओलीले आज शुक्रवार पाल्पाको बगनासकाली गाउँपालिकाको प्रशासकीय भवनको सिंहदरबारबाटै भर्चुअल रूपमा उद्घाटन गरेर बाटो खुला गरिदिएका छन् ।

स्वास्थ्यमा समस्या आएकाले पाल्पा जान नसकेपछि प्रधानमन्त्री ओलीले बालुवाटार स्थित सरकारी निवासबाटै सम्बोधन सहित भवनको उद्घाटन गरेका छन् ।

प्रधानमन्त्री ओलीले उर्वर भूमि बगनासकाली गाउँपालिकाको कार्यक्रमस्थल चिर्तुङ्गधारामा आउने र पाल्पाका जनतासँग भेटघाटको चाहना हुँदाहुँदै रुघाखोकी लागेका कारण प्रत्यक्ष उपस्थित हुन नसकेको सम्बोधनमा बताए ।

प्रशासकीय भवनबाट स्थानीय जनताले राम्रो सेवा पाएर नयाँ अनुभूति गर्ने कार्य होस भनी आग्रह गरे । उनले रमणीय पाल्पाको देश जोगाउने ऐतिहासिक भूमिका खेल्ने जिल्लाको छविलाई कायम राख्ने विश्वास व्यक्त गरे ।

प्रधानमन्त्री ओलीले आफ्नै सरकारको पालामा सुरु गरेको सिद्धबाबा सुरुङ लगायत विकास निर्माणका काम आफ्नै कार्यकालमा सम्पन्न गर्ने गरी काम भइरहेको बताए ।